पुणे : कांदा पीक सातत्याने चर्चेत असते. कधी कांदा शेतकऱ्यांना हसवतो, तर कधी रडवतो. आता केंद्र सरकारने कांदा निर्यात बंदीचा निर्णय लागू केला आहे. परिणामी कांद्याच्या दरात सातत्याने घसरण होत आहे. नाशिक, पुणे, सोलापूर बाजार समित्यांमध्ये १५ दिवसांपूर्वी कांद्याचे दर चार हजारांवर पोहचले होते. आता हे दर निम्म्यावर आले आहेत. दरम्यान, कांद्याचे दर पडल्याने शेतकरी संतप्त झाले असून, अनेक ठिकाणी आंदोलन सुरू आहे. महाराष्ट्रातून दोन लाख मेट्रिक टन कांदा खरेदी करण्याचा निर्णय एनसीसीएफ आणि नाफेडच्या माध्यमातून केंद्र सरकारने घेतल्याची माहिती ‘एनसीसीएफ’च्या व्यवस्थापकीय संचालिका अनिस जोसेफ चंद्रा यांनी दिली.
नाफेड, एनसीसीएफ दोन लाख मेट्रिक टन कांदा खरेदी करणार
केंद्र सरकार नाफेड आणि एनसीसीएफच्या माध्यमातून कांद्याची खरेदी करणार आहे. नाफेड आणि एनसीसीएफ यांनी आतापर्यंत पाच लाख मॅट्रिक कांदा खरेदी केला आहे. अजून दोन लाख टन कांदा खरेदी करुन घसरत असलेले दर रोखण्याचा उपाय सरकार करणार आहे. या दोन्ही संस्थांनी २५ रुपये किलोप्रमाणे कांदा खरेदी सुरू केली आहे. या निर्णयामुळे कांद्याच्या दरात होणारी घसरण रोखण्यास मदत होणार आहे.
दरम्यान, नागपूर येथे सुरु असलेल्या अधिवेशनादरम्यान कांद्यासाठी राज्यात प्रथम कांदा महाबँक स्थापन केल्याची घोषणा मुख्यमंत्री एकनाथ शिंदे यांनी केली. भाभा अणू संशोधन केंद्राचे अध्यक्ष डॉ अजित कुमार मोहंती आणि अनिल काकडकर यासाठी सरकारला मदत करणार आहेत. कांदा कोल्ड स्टोरेजमध्ये ठेवला जाणार आहे. यामुळे कांदा टिकणार असून, सात ते आठ महिन्यांत कांद्याला कोंबही फुटणार नाही. हा प्रयोग केलेला कांदा विधीमंडळात दाखवण्यात आल्याचे मुख्यमंत्री शिंदे यांनी शेतकरी प्रश्नी निवेदन देताना सांगितले.
