पुणे : पुणे मेट्रोच्या हिंजवडी ते शिवाजीनगर या सुमारे २३ किलोमीटर लांबीच्या मार्गावर २३ स्थानके उभारण्यात येत आहेत. या मार्गातील ५ हजार सेगमेंटची उभारणी पूर्ण झाली आहे. यामुळे एकूण १६ किलोमीटरचा मेट्रो मार्ग सेगमेंट बसवून तयार झाला आहे. आता त्यावर रूळ बसवण्यात येणार असून, हा मार्ग एप्रिल २०२४ मध्ये सुरु होणार आहे. यामुळे शिवाजीनगर ते हिंजवडी मार्गावर वाहतूक कोंडीतून पुणेकरांची सुटका होणार आहे.
मेट्रोच्या तिसऱ्या टप्प्याची प्रतीक्षा पुणेकरांना आहे. पीपीपी तत्त्वावर पीएमआरडीएकडून या मार्गाचे काम वेगाने सुरु आहे. पुणे मेट्रोच्या मार्गिका तीन प्रकल्पांच्या कामांना वेग आला आहे. या मार्गावरील कामकाजाची काही दिवसांपूर्वी उपमुख्यमंत्री अजित पवार यांनी पाहणी केली होती. त्यांनी हे काम वेगाने पूर्ण करण्याच्या सूचना अधिकाऱ्यांना दिल्या होत्या. त्यानंतर मेट्रोच्या कामाने वेग घेतला आहे. मेट्रो तीनच्या दोन हजार सेगमेंटची उभारणी २४ एप्रिल २०२३ ला पूर्ण झाली होती. या मार्गावरील ८० टक्के खांबाची उभारणी झाली आहे.
पुणे मेट्रोचे सात महिन्यांच्या कालावधीत तब्बल तीन हजार सेगमेंट उभे करण्यात आले. मेट्रो प्रकल्पाचे प्रत्यक्ष काम सुरू झाल्यापासून गेल्या १६ महिन्यांत पाच हजार सेगमेंटच्या उभारणीचा टप्पा पूर्ण करण्यात आला. यामुळे पुणेकरांना एप्रिल २०२४ पासून मेट्रोचा तिसरा टप्पा मिळण्याची आशा निर्माण झाला आहे.
पुणे मेट्रोसाठी आयटी सिटी मेट्रो रेल लिमिटेड ही कंपनी तयार करण्यात आली आहे. पुढील ३५ वर्ष मेट्रोची जबाबदारी या कंपनीकडे देण्यात आली आहे.
