संदीप टूले
केडगाव : इंदापुरात गोपीचंद पडळकर यांच्यावर करण्यात आलेल्या चप्पलफेकीचे पडसाद आता दौंड तालुक्यातही उमटले आहेत. सकल ओबीसी व धनगर समाजाच्या वतीने गुरूवारी (ता. १३) पुणे-सोलापूर महामार्गावर ‘रास्ता रोको’ आंदोलन करण्यात आले.
गोपीचंद पडळकरांवरील चप्पलफेकीनंतर धनगर समाज, ओबीसी समाजासह इतरही समाज आक्रमक झालेला पाहायला मिळाला. सकल ओबीसी समाजाकडून ठिकठिकाणी ‘रास्ता रोको’ आंदोलन सुरू आहे. चौफुला या ठिकाणी ‘रास्ता रोको’ आंदोलन करत जोरदार घोषणाबाजी करण्यात आली. चप्पलफेकीची घटना निंदणीय असून, या घटनेतील जबाबदार व्यक्तींवर गुन्हे दाखल करावेत, अन्यथा राज्यभर रस्त्यावर उतरू, असा इशारा या वेळी ओबीसी बांधवांकडून देण्यात आला.
चप्पलफेक प्रकरणी संबंधितांवर गुन्हे दाखल करण्याच्या मागणीसह त्यांना त्वरित अटक करण्याची मागणी या वेळी करण्यात आली. चप्पलफेक करणे म्हणजे वादाचा प्रकार आहे. दोन दिवसांत कारवाई न झाल्यास तीव्र आंदोलन करण्याचा इशाराही आंदोलनकर्त्यांनी दिला.
या वेळी ओबीसी नेते महेश भागवत, पांडुरंग मेरगळ, दौलत ठोंबरे, बाळासाहेब तोंडे पाटील, संजय इनामके, आबासाहेब चोरमले, मोहन टुले, दत्तात्रय दुबे आदींसह शेकडो कार्यकर्ते या वेळी उपस्थित होते.
