पुणे : सावित्रीबाई फुले पुणे विद्यापीठातर्फे जीएच रायसोनी काॅलेज ऑफ इंजिनिअरिंग आणि मॅनेजमेंटच्या संगणक विज्ञान विभागाच्या प्रमुख डॉ. सिमरन राजीव खियानी यांना शैक्षणिक वर्ष 2023-24 साठी ग्रामीण क्षेत्राचा सर्वोत्कृष्ट अभिनव अध्यापन (व्यावसायिक अभ्यासक्रम) पुरस्कार जाहीर करण्यात आला. हा पुरस्कार सावित्रीबाई फुले पुणे विद्यापीठातर्फे देण्यात येणाऱ्या प्रतिष्ठित विद्यापीठ स्थापना दिन पुरस्कारांचा एक भाग आहे.
सावित्रीबाई फुले पुणे विद्यापीठ कुलगुरू प्रा. डॉ. सुरेश गोसावी यांनी पुरस्काराचे पुष्टीकरण पत्र पाठवून त्यांना पुरस्कार स्वीकारण्यासाठी आमंत्रित केले. हा पुरस्कार 10 फेब्रुवारी, 2024 रोजी पुणे विद्यापीठ कॅम्पस येथे विद्यापीठ स्थापना दिन समारंभात अधिकृतपणे प्रदान केला जाईल.
जीएच रायसोनी काॅलेज ऑफ इंजिनिअरिंग आणि मॅनेजमेंटचे कॅम्पस संचालक डॉ. आर. डी. खराडकर यांनी या उल्लेखनीय कामगिरीबद्दल डॉ. सिमरन खियानी यांचे अभिनंदन केले.
पुढे त्यांनी सांगितले की, डॉ. खियानी यांच्या नाविन्यपूर्ण शिकवण्याच्या पद्धतींचा केवळ त्याच्या विद्यार्थ्यांवरच परिणाम झाला असे नाही तर ग्रामीण भागातील शैक्षणिक परिदृश्यावरही कायमचा ठसा उमटला आहे. रायसोनी ग्रुप ऑफ इन्स्टिट्यूशन्सचे अध्यक्ष सुनील रायसोनी आणि रायसोनी ग्रुप ऑफ इन्स्टिट्यूशन्सचे कार्यकारी संचालक श्रेयश रायसोनी यांनी डॉ. सिमरन खियानी यांचे त्यांच्या उल्लेखनीय कामगिरीबद्दल अभिनंदन केले.
