पुणे : शिरूर तालुक्याच्या वाजेवाडी परिसरात मागील दोन दिवस झाले चंदन चोरांचा धुमाकूळ सुरू आहे. परिसरातील नागरिकांनीया चोरांना र्पखण्याचा प्रयत्न केला खरा परंतु चंदन चोरांकडून नागरिकांवर प्रतिहल्ला करण्यात आला आहे. यामध्ये तीन जण जखमी झाले आहेत. त्यांना उपचारासाठी रुग्णालयात दाखल करण्यात आले आहे.
अधिक माहिती अशी की, पुण्याच्या शिरूर तालुक्यात असलेल्या वाजेवाडी परिसरात चंदन चोरी केली जात आहे. परिसरातील नागरिकांच्या हा सर्व प्रकार लक्षात आल्यानंतर चंदन चोरी करण्यासाठी आलेल्या चंदन चोरांना स्थानिक नागरिकांनी विरोध केला. मात्र चंदन चोर चंदनाची लाकडे चोरी करण्यासाठी पूर्ण तयारीने आल्याने नागरिकांनी केलेल्या विरोधास न जुमानता त्यांनी नागरिकांवरच प्रतिहल्ला चढवला.
यावेळी चंदन चोरांकडे असलेल्या गलोरीच्या माध्यमातून नागरिकांना दगड मारणात आले. यामध्ये दगड लागून तीन जण जखमी झाले आहेत. यामध्ये एक महिला, एक मुलगा व एका तरुणाचा समावेश असून या चंदन चोरामुळे परिसरात भितीचे वातावरण निर्माण झाले आहे. याबाबत पोलिसात तक्रार दाखल केली असून अधिक तपास पोलीस करत आहेत.
