पुणे, ता. 21: शिरगाव-परंद्वादी पोलीस ठाण्यात दाखल असलेल्या बलात्कार व पोक्सो प्रकरणातील 20 वर्षीय विद्यार्थ्याला मुंबई उच्च न्यायालयाने अटी व शर्थींवर जामीन मंजूर केला आहे. न्यायमूर्ती शिवकुमार दिघे यांच्या खंडपीठाने आरोपीस अटी व शर्थींवर जामीन मंजूर करण्याचे आदेश दिले. रुद्रा अरुण वाघाये असे जामीन मंजूर झालेल्या आरोपीचे नाव आहे. आरोपी हा पुण्यातील नामांकित महाविद्यालयात शिक्षण घेत असल्याची माहिती आरोपीचे वकील अॅड. नितीन भालेराव यांनी दिली.
मिळालेल्या माहितीनुसार, 18 जून 2024 रोजी शिरगाव-परंद्वादी पोलीस ठाणे येथे फिर्यादीच्या तक्रारीवरून आरोपीविरुद्ध पीडितेवर बलात्कार करून ती गर्भवती राहिल्याचा गुन्हा दाखल करण्यात आला होता. त्यानंतर पोलिसांनी आरोपीला अटक केली होती. पुढे त्याची रवानगी येरवडा कारागृह येथे करण्यात आली होती.
आरोपी कारागृहात असताना त्याच्या वतीने अॅड. नितीन भालेराव यांनी उच्च न्यायालयात जामिनासाठी अर्ज दाखल केला होता. सुनावणीदरम्यान अॅड. विपुल दुशिंग यांनी आरोपीतर्फे युक्तिवाद करत, आरोपी व पीडित एकाच महाविद्यालयात शिक्षण घेत असताना त्यांच्यात प्रेमसंबंध होते, असा दावा केला. तसेच आरोपी मागील एक वर्षांपासून न्यायबंदी असून अद्याप खटल्याची सुनावणी सुरू झालेली नाही, असेही न्यायालयाच्या निदर्शनास आणून दिले.
दोन्ही बाजूंचा युक्तिवाद ऐकून न्यायमूर्ती शिवकुमार दिघे यांच्या खंडपीठाने आरोपीस अटी व शर्थींवर जामीन मंजूर करण्याचे आदेश दिले. या प्रकरणात अॅड. तन्मय काटे व अॅड. अश्रफ काझी यांनीही सहाय्य केले.
दरम्यान, जामीन मंजूर झाला असला तरी प्रकरणातील मुख्य खटल्याची सुनावणी पुढे सुरू राहणार असून न्यायालयाच्या अटींचे पालन करणे आरोपीस बंधनकारक असणार आहे.
