Crime : अहिल्यानगरमध्ये अत्याचार प्रकरणांमुळे शहरातील कायदा-सुव्यवस्थेवर गंभीर प्रश्नचिन्ह निर्माण झाले आहे. याच दरम्यान आता माजी महापौर तथा राष्ट्रवादी काँग्रेस (शरदचंद्र पवार गट) शहर जिल्हाध्यक्ष अभिषेक कळमकर यांच्याविरोधात २५ वर्षीय तरुणीने अत्याचाराची तक्रार दाखल केली आहे.
नोकरीचे आमिष दाखवून संपर्क वाढवण्यात आल्याचा आरोप आहे. शाळेत नोकरी लावून देण्याचे आश्वासन देत त्यांनी तरुणीला वारंवार भेटीस बोलावले. नगर शहरातील विविध ठिकाणांवर तसेच पुणे जिल्ह्यातील शिरूर येथील लॉजमध्ये नेऊन अत्याचार केल्याचे फिर्यादीत नमूद आहे. मोबाईलवर व्हिडिओ कॉल करून अश्लील कृत्यांस भाग पाडणे, त्याचे चित्रीकरण करून व्हायरल करण्याची धमकी देत ब्लॅकमेल करणे, अशा गंभीर आरोपांमुळे प्रकरणाला वेगळे गांभीर्य प्राप्त झाले आहे. काही व्हिडिओ पुरावेही पोलिसांकडे जमा झाल्याची माहिती आहे.
गुन्हा दाखल झाल्यानंतर कळमकर फरार असून त्यांचा शोध सुरू आहे. सत्ताधारी आणि विरोधी राजकारणात या घटनेचे पडसाद उमटले असून महिला सुरक्षेच्या मुद्द्यावर चर्चा पुन्हा तीव्र झाली आहे.
