उरुळी कांचन, ता. 20: उरुळी कांचन (ता. हवेली) येथील फक्त मुलींची शाळा म्हणून ओळख असलेल्या उन्नती कन्या विद्यालयात नुकतीच कराटे यलो बेल्ट परीक्षा उत्साहात पार पडली.
शाळेच्या कराटे प्रशिक्षिका शितल कांचन यांनी विद्यार्थिनींना तांत्रिक कौशल्य, शिस्त आणि आत्मसंरक्षणाचे धडे दिले. परीक्षेसाठी USKA संस्थेचे अध्यक्ष व संचालक रेन्शी संजय स्टेट, राष्ट्रीय सुवर्णपदक विजेत्या रेन्शी आरती मोहित मल्ला तसेच शिशान गणेश अहिरकर पर्यवेक्षक म्हणून उपस्थित होते. त्यांच्या हस्ते 43 विद्यार्थिनींना यलो बेल्ट प्रदान करण्यात आला.
अध्यक्षा नयॉन सुरेश कांचन, संचालिका डॉ. नुपूर सुरेश कांचन आणि मुख्याध्यापिका पद्मादेवी विडप यांच्या मार्गदर्शनाखाली आयोजित या उपक्रमात तिसरी ते आठवीच्या विद्यार्थिनींनी उत्स्फूर्त सहभाग नोंदवला. प्रात्यक्षिकांदरम्यान विद्यार्थिनींच्या आत्मविश्वासपूर्ण हालचाली, नेमकेपणा आणि जिद्दीने उपस्थितांची मने जिंकली. मुख्याध्यापिका पद्मादेवी विडप यांनी विद्यार्थिनींना भविष्यात आंतरराष्ट्रीय पातळीवर चमकण्याचे ध्येय ठेवण्याचे आवाहन केले.
दरम्यान, या उपक्रमामुळे मुलींमध्ये आत्मविश्वास, शिस्त आणि स्वसंरक्षणाची जाणीव दृढ झाली असून विद्यालयाच्या क्रीडा वाटचालीत हा एक महत्त्वाचा टप्पा ठरला आहे.
