पुणे : पुणे शहरात गेल्या काही महिन्यांपासून कोयता गँगने विविध भागांमध्ये धुमाकूळ घातला आहे. यामुळे गुन्हेगारी बळावल्याचे चित्र दिसून येत आहे. अशातच आज काही गुंडांनी सिंहगड रोडवरील एका सोसायटीमध्ये घुसून एका तरुणावर जीवघेणा हल्ला केला आहे. या हल्ल्यामध्ये एका तरुणाचा जागीच मृत्यू झाला आहे. सतीश थोपटे असे मृत्यू झालेल्या तरुणाचं नाव आहे.
मिळालेल्या माहितीनुसार, सिंहगड रोडवरील कोल्हेवाडीमध्ये ही घटना घडली आहे. हा भाग खडकवासला इथं असून भर दिवसा तीन-चार गुडांच्या टोळीकडून इथं हातात कोयते घेऊन दहशत माजवण्यात आली. या हल्ल्यात सतीश थोपटे नामक तरुण गंभीरित्या जखमी झाल्यानं त्याचा जागीच मृत्यू झाला आहे.
याप्रकरणाची माहिती मिळताच पोलिसांनी घटनास्थळी धाव घेतली. त्यानंतर संबंधितांवर गुन्हा दाखल करण्याची प्रक्रिया सुरु केली आहे. या हल्ल्याचा अधिक तपास हवेली पोलीस करत आहेत.
