पुणे : पुणे शहराच्या मध्यवर्ती भागांमध्ये पुन्हा एकदा पाणीपुरवठा विस्कळीत झाला आहे. आजपासून शहरातील अनेक भागांत केवळ एक वेळ पाणी सोडण्यात येणार आहे. त्यामुळे पाणी जपून वापरण्याचे आवाहन पुणे महानगरपालिकेने नागरिकांना केले आहे. शहरातील अनेक भागांमध्ये कमी दाबाने पाणीपुरवठा होईल, असे निवेदनात म्हटले आहे.
पुणे मनपाच्या पर्वती येथील एमएलआर टाकी ते जगताप हाऊसदरम्यान नव्याने टाकलेल्या १४७३ मिमी व्यासाच्या पाइपलाईनचे काम पूर्ण करण्यासाठी हा निर्णय घेण्यात आला आहे. ८ जानेवारी ते २२ जानेवारी या कामासाठी वेळ लागण्याची शक्यता आहे. या कालावधीमध्ये भवानी पेठ, स्वारगेट परिसर, शंकर शेठ रस्ता या परिसरात दिवसातून एक वेळा पाणीपुरवठा केला जाणार आहे. हे काम पूर्ण होईपर्यंत नागरिकांनी सहकार्य करावे, असे आवाहन पुणे महापालिकेच्या पाणीपुरवठा विभागाने केली आहे.
स्वारगेट पोलीस वसाहत, झगडेवाडी, खडकमाळ आळी, संपूर्ण घोरपडी पेठ, मोमिनपुरा, टिंबर मार्केट, महात्मा फुले पेठ, गंजपेठ, गुरुवार पेठ, धोबी घाट, खडक पोलीस वसाहत या भागात एकच वेळ पाणी असेल. याशिवाय लोहिया नगर, इनामकेमळा, घोरपडे पेठ, एकबोटे कॉलनी, कासेवाडी, गुरुनानकनगर, नेहरू रस्ता, संपूर्ण भवानी पेठ परिसर, बालाजी व भवानी माता मंदिर परिसर, नवीन नाना पेठ, हरकानगर, चुडामण तालीम या भागांमध्येही एकच वेळ पाणी येणार आहे.
वायमेकर चाळ, राजेवाडी, पत्राचाळ एसआरए, भगवान दास चाळ, भवानी पेठ पोलीस वसाहत, सोमवार पेठ पोलीस वसाहत, बरके आळी, पद्मजी सोसायटी परिसर, महीफिल वाडा, साठेवाडा, रमेश फर्निचर परिसर, सायकल सोसायटी, मुकुंदनगर, व्हेईकल डेपो, अप्सरा टॉकीज परिसर, टिळक महाराष्ट्र विद्यापीठ, सीपीएडबल्यू क्वार्टर, रांका हॉस्पिटल परिसर, शंकरशेठ रस्ता एसटी बस स्थानक ते धोबी घाट परिसर उजवी बाजू, मीरा सोसायटी, लक्ष्मी नारायण चौकीच्या मागील वस्ती, मित्र मंडळ कॉलनी, या भागात दिवसातून एक वेळा पाणीपुरवठा केला जाणार आहे.
