पुणे: पुणे महानगर प्रदेश विकास प्राधिकरणाच्या पेठ क्र. १२, ३०-३२ येथील परवडणारी घरे योजनेअंतर्गत लॉटरी काढण्यात आली होती. त्याची सोडत येत्या बुधवारी (दि. १२ फेब्रुवारी) मुख्यमंत्री, उपमुख्यमंत्री यांच्या हस्ते मुंबईत व्हिडिओ कॉन्फरन्सद्वारे करण्यात येणार आहे.
पीएमआरडीएच्या पेठ क्र. १२ येथील ईडब्ल्यूएस (१ बीएचके) प्रवर्गातील ४७सदनिका व एलआयजी (२ बीएचके) प्रवर्गातील ६१४ सदनिका आणि पेठ क्र. ३०-३२ येथील परवडणारी घरे योजनेंतर्गत ईडब्ल्यूएस (वन आरके) प्रवर्गातील ३४७ सदनिका व एलआयजी (१ बीएचके) प्रवर्गातील ३२९ सदनिका अशा एकूण १३३७ शिल्लक सदनिकांची लॉटरी काढली होती. यासाठी १५ डिसेंबर २०२४ पर्यंत ३ हजार २७१ लाभाथ्यांनी अर्ज सादर केले होते. त्यापैकी ३२५६ अंतिमतः पात्र झाले, तर उर्वरित १५ लाभार्थी अपात्र ठरले होते. पात्र लाभार्थ्यांकरिता सदनिकाची सोडत २२ जानेवारीला नियोजित होती. मात्र, प्रशासकीय कारणामुळे ती पुढे ढकलली होती.
सदनिकांची सोडत बुधवार, १२ फेब्रुवारी रोजी सकाळी साडेअकराला मुख्यमंत्री देवेंद्र फडणवीस यांच्या हस्ते व्हिडिओ कॉन्फरन्सद्वारे होणार आहे. उपमुख्यमंत्री एकनाथ शिंदे, उपमुख्यमंत्री अजित पवार, नगरविकास विभागाच्या राज्यमंत्री माधुरी मिसाळ यांच्या प्रमुख उपस्थितीत मंत्रिमंडळ परिषद सभागृह, सह्याद्री अतिथिगृह, मलबार हिल, मुंबई येथे हा कार्यक्रम होणार आहे. स्थानिक पातळीवर श्री छत्रपती शिवाजी महाराज सभागृह, पुणे महानगर प्रदेश विकास प्राधिकरण, आकुर्डी येथे होणार आहे. अर्जदारांनी पीएमआरडीएच्या आकुर्डी येथील कार्यालयात उपस्थित राहण्याचे आवाहन महानगर आयुक्त डॉ. योगेश म्हसे यांनी केले आहे.
