(Pune News )पुणे : पुणेकरांसाठी एक महत्वाची बातमी आहे. सध्या पुणे बंगळूर महामार्गावरील चांदणी चौकातील नवीन उड्डाण पुलाचे उद्घाटन येत्या १ मे रोजी होणार आहे. १० एप्रिलला चांदणी चौकातील सर्विस रोड सुरू होणार आहे, त्यामुळे चांदणी चौकातील वाहतूक या दोन पर्यायी मार्गाने वळवण्याचा प्रशासनाचा विचार आहे. त्या अनुषंगाने लवकरच परिपत्रक शासनाकडून जाहीर करण्यात येणार असल्याची माहिती आहे.
चांदणी चौकातील वाहतूक पर्यायी मार्गाने वळवली जाणार…!
या पुलाचे काम जवळपास ९० टक्के पूर्ण झाले असून येथे १५ ते २० एप्रिल दरम्यान गर्डर टाकण्याचे काम करण्यात येणार आहे. या पार्श्वभूमीवर चांदणी चौकातील वाहतूक पर्यायी मार्गाने वळवली जाणार आहे. या कामांमुळे दोन दिवस चांदणी चौकातील वाहतूक बंद असणार आहे. पुणेकरांना पर्यायी मार्गाचा वापर करावा लागणार आहे.
दरम्यान, चांदणी चौकातून दुसरीकडे जाणाऱ्या सर्व्हिस रोडची कामे पूर्ण झाली आहेत. यामुळे १० एप्रिलला चांदणी चौकातील सर्व्हिस रोड सुरु होणार आहे. मुळशीकडे जाणाऱ्या भुयारी मार्गाचे कामही प्रगतिपथावर आहे. याशिवाय बावधन ते सातारा आणि वेदभवन ते मुळशी या सेवा रस्त्यांची कामे पूर्ण झाली आहे. अशी माहिती ‘एनएचएआय’कडून देण्यात आली आहे
