Pune News : पुणे : दुधामध्ये भेसळ करणाऱ्यांवर आता कारवाईचा बडगा उगारण्यात येणार आहे. ही भेसळ रोखण्यासाठी अतिरिक्त जिल्हाधिकाऱ्यांच्या अध्यक्षतेखाली समिती स्थापन करून त्याद्वारे भेसळखोरांवर छापा टाकण्याचा निर्णय घेण्यात आला आहे. तसेच, दूध संस्थांवर फौजदारी कारवाईसोबत भेसळखोरांना चाप लावण्यासाठी त्यांच्यावर ‘मकोका’ची कारवाई करता येईल का, याची चाचपणी राज्य सरकार करीत आहे,’ अशी माहिती दुग्ध विकासमंत्री राधाकृष्ण विखे पाटील यांनी गुरुवारी दिली.
अतिरिक्त जिल्हाधिकाऱ्यांच्या अध्यक्षतेखाली छापा टाकण्यासाठी समिती नियुक्त करण्यात येणार
जिल्हाधिकारी कार्यालयात दूध दरवाढ आणि अन्य विषयांबाबत झालेल्या बैठकीनंतर राज्याचे महसूल,तसेच पशु, दूग्धविकास मंत्री राधाकृष्ण विखे पाटील यांनी विविध निर्णयांची माहिती माध्यमांना दिली. या वेळी माजी मंत्री सदाभाऊ खोत, आमदार राहुल कुल; तसेच पशुसंवर्धन विभागाचे अधिकारी उपस्थित होते.
‘राज्यांमध्ये दूध भेसळ होत असल्याच्या तक्रारी येऊ लागल्या आहेत. त्या पार्श्वभूमीवर, दूध भेसळखोरांवर छापा टाकून त्यांच्यावर कारवाई करण्याचा निर्णय घेण्यात आला आहे. त्यासाठी अतिरिक्त जिल्हाधिकाऱ्यांच्या अध्यक्षतेखाली छापा टाकण्यासाठी समिती नियुक्त करण्यात येणार आहे. (Pune News) त्यामध्ये जिल्हा दुग्धविकास अधिकारी, पशुसंवर्धन अधिकारी, ग्रामीण पोलीस अधिकारी यांच्यासह इतर अधिकाऱ्यांचा समावेश असणार आहे. वाळू माफियांप्रमाणे भेसळखोरांवर ‘मकोका’ची कारवाई करण्यात येईल का याबाबत कायदेशीर बाजू तपासण्यात येईल,’ अशी माहिती महसूल मंत्री राधाकृष्ण विखे पाटील यांनी दिली. श्रीगोंद्यात दूध भेसळखोरांवर कारवाई करण्यात आल्यानंतर ६० हजार लिटर दुधाची आवक कमी झाली आहे. तसेच एफडीएमार्फत कारवाई झाल्यास दूधातील भेसळ रोखण्यास मदत होईल, असा विश्वासही त्यांनी व्यक्त केला.
राज्यामध्ये अन्न व औषध प्रशासनाकडे (एफडीए) कर्मचाऱ्यांची कमतरता आहे. (Pune News) त्यामुळे दुधातील भेसळ रोखणे अशक्य होत आहे. महाराष्ट्राला भेसळमुक्त दूध मिळावे यासाठी महसूल विभागाने पावले उचलली आहेत. भेसळयुक्त दूध विकत घेणाऱ्या संस्थांवरही फौजदारी कारवाई करण्यात येणार आहे.
– राधाकृष्ण विखे पाटील, दुग्धविकास मंत्री
अधिक बातम्या वाचण्यासाठी येथे क्लिक करा :
Pune News : धक्कादायक! सुपारी घेऊन पत्रकारावर गोळीबार ; जमिनीच्या व्यवहारातून घडला प्रकार
