Pune News : पुण्यातील नऱ्हे परिसरात उघडकीस आलेल्या एका कारवाईने शहरातील तथाकथित “सुरक्षित” भागांमागील धक्कादायक वास्तव समोर आणले आहे. स्वर्ग एक्झिक्युटिव्ह पॅराडाईज लॉज या नावाने चालणाऱ्या लॉजमध्ये सुरू असलेल्या देहव्यापाराच्या रॅकेटवर गुन्हे शाखेने टाकलेल्या छाप्यामुळे परिसरात खळबळ उडाली आहे.
गुन्हे शाखेच्या अनैतिक मानवी वाहतूक प्रतिबंध पथकाला काही दिवसांपासून या ठिकाणी संशयास्पद हालचालींची माहिती मिळत होती. विशेषतः शिक्षणसंस्थांच्या जवळ असलेल्या या लॉजबाबत स्थानिकांमध्येही शंका व्यक्त होत होती. तपास अधिक खात्रीशीर करण्यासाठी पोलिसांनी प्रथम बनावट ग्राहक पाठवला. व्यवहार निश्चित झाल्यानंतर योग्य क्षणी छापा टाकत संपूर्ण प्रकार उघडकीस आणण्यात आला.
या कारवाईत 4 महिलांची सुटका करण्यात आली असून त्यांना तातडीने सुरक्षित ठिकाणी हलवण्यात आले. प्राथमिक माहितीनुसार, या महिलांकडून जबरदस्तीने देहव्यापार करून घेतला जात होता. पोलिसांनी अभिषेक गवळी, रामू देवकर आणि महेश नागने या 3 संशयितांना ताब्यात घेतले आहे. त्यांच्याविरोधात 1956 च्या अनैतिक मानवी वाहतूक प्रतिबंध कायद्यानुसार गुन्हा दाखल करण्यात आला आहे.
दरम्यान, सुटका करण्यात आलेल्या महिलांची वैद्यकीय तपासणी आणि समुपदेशन सुरू असून, या रॅकेटमागील मोठे जाळे उघड करण्यासाठी तपास अधिक तीव्र करण्यात आला आहे.
