पुणे: पुणे शहरातील मनसुखभाई (Pune News) कोठारी नॅशनल स्कूलचा १५ वर्षांचा विद्यार्थी स्वानंद राजकुमार भोरे याने मानसिक गणितातील असाधारण वेगाच्या जोरावर गिनीज वर्ल्ड रेकॉर्ड नोंदवून आंतरराष्ट्रीय स्तरावर पुण्याचा मान वाढवला आहे. पॅडरबॉर्न, जर्मनी येथे १५ सप्टेंबर २०२४ रोजी झालेल्या स्पर्धेत त्याने १०-अंकी दहा गणितांची, म्हणजे एकूण १००० संख्यांची मानसिक बेरीज फक्त १ मिनिट २८.४० सेकंदांत पूर्ण केली. अत्यंत कठीण समजल्या जाणाऱ्या या प्रकारातील त्याची कामगिरी जागतिक स्तरावर अपूर्व मानली जात असून ही नोंद अधिकृत गिनीज वर्ल्ड रेकॉर्डमध्ये समाविष्ट झाली आहे. (Breaking News)
स्वानंदने गेल्या काही वर्षांत मानसिक गणितात सलग उल्लेखनीय यश मिळवले आहे. २०२४ मधील ‘अल्टरनेटिव्ह बुक ऑफ रेकॉर्ड्स’ने नोंदवलेला मानसिक बेरीजमधील जागतिक विक्रम, मानसिक गणित विश्वचषक २०२३ आणि २०२४ मधील जागतिक क्रमांक १, सुपर टॅलेंटेड किड पुरस्कार २०२२, गोल्डन बुक ऑफ वर्ल्ड रेकॉर्ड, दोन इंडिया बुक ऑफ रेकॉर्ड, तसेच माइंड स्पोर्ट्स ऑलिंपियाड लंडनमधील कांस्यपदक यांसारख्या अनेक आंतरराष्ट्रीय यशांनी त्याची प्रतिभा अधोरेखित झाली आहे. ऑस्ट्रेलियातील मॅथेलेटिक्स वर्ल्ड चॅम्पियनशिपमध्येही २०२४ मध्ये त्याने जगात क्रमांक १ मिळवला. दुबईतील मेमोरियाड वर्ल्ड मेंटल स्पोर्ट्स ऑलिंपिकमध्ये त्याने कांस्यपदक पटकावले.
मोठ्या संख्यांची बेरीज, वजाबाकी किंवा गुणाकार कागद-पेनशिवाय करण्याची त्याची क्षमता उच्च एकाग्रता, मेंदूची विलक्षण प्रक्रिया गती आणि उत्कृष्ट स्मरणशक्तीचे उदाहरण मानली जाते. त्याचे शिक्षक सांगतात की स्वानंदची शिस्तबद्ध दिनचर्या, सततचा सराव आणि गणितावरील नैसर्गिक आवड हेच त्याच्या यशाचे मूळ आधार आहेत.
या यशामागे कुटुंबाचाही मोठा वाटा आहे. त्याच्या आई-वडिलांनी त्याची गणितातील विशेष आवड ओळखून त्याला योग्य वातावरण, प्रोत्साहन आणि संधी उपलब्ध करून दिल्या. शाळा प्रशासनानेही त्याच्या यशाचा गौरव करत त्याला इतर विद्यार्थ्यांसाठी प्रेरणादायी ठरवले आहे. गिनीज रेकॉर्डनंतरही स्वानंद आणखी कठीण आव्हानांसाठी सज्ज आहे. जागतिक स्तरावर नवे विक्रम प्रस्थापित करून भारताचे नाव अधिक उज्ज्वल करण्याचे त्याचे ध्येय आहे.
