पुणे: मेट्रो, रिंग रोड, नियोजित पुरंदर विमानतळ (Pune News) आणि विविध (Pune Metro) विकास प्रकल्पांमुळे पुणे (Pune Ring Road) शहरासह संपूर्ण जिल्ह्यात सदनिका व जमीन खरेदी-विक्रीच्या व्यवहारात मोठी वाढ झाली आहे. याचाच परिणाम म्हणून राज्यातील दस्त नोंदणीत पुणे जिल्ह्याने अव्वल स्थान मिळवले आहे. गेल्या सहा महिन्यांत जिल्ह्यात तब्बल 5 लाख 76 हजार दस्तांची नोंदणी झाली असून, त्यातून तब्बल 5,980 कोटी रुपयांचे उत्पन्न महसूल विभागाला मिळाले आहे.
राज्यभरात या कालावधीत 22 लाख दस्त नोंदणी झाले असून, त्यातून सरकारला 28,095 कोटी रुपयांचे उत्पन्न मिळालं आहे. यात पुणे, मुंबई शहर, मुंबई उपनगर, नाशिक, नागपूर, छत्रपती संभाजीनगर आणि ठाणे या प्रमुख जिल्ह्यांचा वाटा मोठा आहे. मात्र, व्यवहारांच्या संख्येच्या बाबतीत पुणे आघाडीवर आहे.
गेल्या काही वर्षांत समृद्धी महामार्ग, नवी मुंबई विमानतळ, पुण्यातील रिंग रोड, विविध उड्डाणपूल आणि महामार्ग प्रकल्प राबवले जात आहेत. त्यामुळे खरेदी-विक्रीचे व्यवहार वेगाने वाढत आहेत. याशिवाय सरकारने यंदा बाजारमूल्य दर (रेडीरेकनर) वाढविल्यानेही व्यवहारांच्या नोंदींमध्ये वाढ झाली आहे.
सहा महिन्यांच्या कालावधीत सदनिका, जमीन खरेदी-विक्री, लिव्ह अँड लायसन्स, ई-रजिस्ट्रेशन अशा विविध प्रकारच्या दस्त नोंदी झाल्या. पुणे शहरात मेट्रो मार्गावर अनेक गृहप्रकल्प आकार घेत आहेत. रिंग रोडच्या आसपास तर जमिनींची खरेदी-विक्री मोठ्या प्रमाणावर सुरू असल्याने दस्तसंख्या वाढत आहे.
“पुढील डिसेंबर ते फेब्रुवारी या तीन महिन्यांत दस्त नोंदणीचे प्रमाण आणखी वाढेल. दिवाळीनंतर महसुलात चांगली वाढ होईल,” असा विश्वास जिल्हा सहनिबंधक आणि मुद्रांक जिल्हाधिकारी संतोष हिंगाणे यांनी व्यक्त केला.
दरम्यान, नोंदणी महानिरीक्षक व मुद्रांक नियंत्रक रवींद्र बिनवडे म्हणाले, “पुणे जिल्ह्यात रिंग रोड, मेट्रो, आयटी हब यांमुळे विकासाची गती वाढली आहे. त्यामुळे नागरिकांना पुण्यात घर घेण्याची पसंती वाढली आहे. ‘आयटी हब’मुळे लिव्ह अँड लायसन्सची नोंदणी लक्षणीय प्रमाणात झाली आहे. सदनिका व जमीन खरेदी-विक्री मोठ्या प्रमाणावर होत असल्याने महसुलात भरघोस वाढ झाली आहे. वर्षअखेर महसुलाचे उद्दिष्ट निश्चितच साध्य करू.”
यामुळे पुणे जिल्हा हा राज्यातील सर्वाधिक आकर्षक गुंतवणूक केंद्र म्हणून पुढे येत असून, आगामी महिन्यांत व्यवहारांचा वेग अधिकच वाढण्याची शक्यता वर्तवली जात आहे.
