Pune News : पुणे : चंद्रयान ३ मोहिमेत भारतीय शास्त्रज्ञांना यश मिळावे आणि चंद्रयान मोहीम यशस्वी व्हावी म्हणून कुलदैवत जेजुरीच्या खंडेरायला साकडे घालण्यात आले आहे. मार्तंड देव संस्थान आणि पुजारी सेवक वर्गाकडून मल्हारी मार्तंडाला देव संस्थानचे विश्वस्त अनिल सौंदडे यांच्या हस्ते विधीवत पूजा करून अभिषेक घालण्यात आला. या वेळी देवस्थानचे कर्मचारी तसेच भाविक उपस्थित होते.
विधीवत पूजा करून अभिषेक
आजचा दिवस भारतासाठीच नव्हे तर जगासाठी महत्वाचा आहे. कारण चंद्रयान ३ आज चंद्राच्या काळोख्या बाजुला उतरणार आहे. ही जागा जगापासून लपून राहिलेली आहे. आजवर भारतासह अन्य देशांनी पृथ्वीकडील प्रकाशमान भागावरच यान उतरविलेले आहे. अशातच चंद्रयान २ चे अपयश आणि रशियाच्या लुना २५ चे अपयश यामुळे सर्वांच्या मनात धाकधुक आहे. चंद्रयान -३ आज सायंकाळी सहा वाजून ४ मिनिटांनी चंद्राच्या पृष्ठभागावर सॉफ्ट लँडिंग करणार आहे.
चंद्रावर जात असलेले हे भारतीय अंतराळ संशोधन यान चंद्राच्या दक्षिण ध्रुवावर उतरेल. या ठिकाणी आतापर्यंत कुठलेही यान पोहोचले नाही असे सांगितल्याची माहिती आहे. म्हणून संपूर्ण जगभरातील शास्त्रज्ञांसाठी चंद्रयान ३ मोहीम अत्यंत महत्त्वाची व मोठी अशी ठरणार आहे . चंद्रयान २ नंतर भारताचा दुसरा प्रयत्न असणार आहे. परंतु आपल्या देशातील तंत्रज्ञान किती प्रमाणात विकसित आहे हे दाखवण्याची संधी भारताला मिळालेली आहे.
यशस्वी लँडिंग होण्यासाठी भारतीयांकडून प्रार्थना केली जात आहे. देवासमोर अभिषेक, नारळ चढवून पूजाही केली जात आहे. अशातच चंद्रयान – ३ मोहीम यशस्वी होण्यासाठी जेजुरीच्या खंडेरायाला साकडे घालण्यात आले आहे. भारताचे चंद्रयान आज सायंकाळी चंद्रावर उतरत आहे. या घटनेकडे संपूर्ण जगाचे लक्ष लागले आहे. तर संपूर्ण देशभर पूजा अभिषेक, प्रार्थना सुरू आहेत.
