पुणे: येरवडा परिसरात एका (Pune News) महिलेला सायबर चोरट्यांनी तब्बल 27 लाख 50 हजार रुपयांनी फसवले. या प्रकरणी चोरट्यांनी स्वतःला (Pune Cyber Crime) सीबीआय अधिकारी असल्याचे भासवले आणि महिलेला मनी लाँड्रिंगच्या नावाने घाबरवून पैसे लाटले. ही घटना 5 एप्रिल 2025 ते 22 एप्रिल 2025 या कालावधीत घडली असून, येरवडा पोलिसांनी अज्ञात व्यक्तींविरुद्ध गुन्हा नोंदवला आहे. पोलिसांनी दिलेल्या माहितीनुसार, सायबर चोरट्यांनी रितेश राव आणि शिवा सर अशी नावे सांगून महिलेशी संपर्क साधला. त्यांनी महिलेच्या मोबाईल नंबर आणि बँक खात्यांचा वापर मनी लाँड्रिंगसाठी झाला असल्याची भीती दाखवली. तपासात सहकार्य न केल्यास मोठी कारवाई केली जाईल, अशी धमकी देत चोरट्यांनी महिलेला मानसिकदृष्ट्या त्रास दिला. त्यानंतर तपास पूर्ण करण्यासाठी आणि केस क्लिअर करण्यासाठी तुमचे पैसे तात्पुरते तपास खात्यात जमा करावे लागतील, असे सांगून महिलेला फसवण्यात आले.
महिलेने चोरट्यांच्या सांगण्यावर विश्वास ठेवून विविध बँक खात्यांमध्ये एकूण 27 लाख 50 हजार रुपये ट्रान्सफर केले. तपास पूर्ण झाल्यावर पैसे परत दिले जातील, असे आश्वासनही चोरट्यांनी दिले. मात्र अनेक दिवस झाले तरी पैसे परत न मिळाल्याने महिलेने पोलिसांकडे तक्रार केली. तक्रार मिळताच पोलिसांनी गुन्हा नोंदवून तपास सुरू केला आहे. चोरट्यांचा शोध घेण्यासाठी तांत्रिक तपास सुरू आहे.
या घटनेमुळे पुन्हा एकदा सायबर गुन्हे वाढत असल्याचे समोर आले आहे. नागरिकांनी अनोळखी व्यक्तींनी केलेल्या कॉल्स, व्हॉट्सअॅप मेसेज किंवा ईमेलवर विश्वास ठेवू नये, असे पोलिसांनी आवाहन केले आहे. कोणत्याही सरकारी अधिकारी, पोलीस किंवा सीबीआय अधिकारी नागरिकांकडून फोनवर पैसे मागत नाहीत. संशयास्पद कॉल आल्यास त्वरित नजीकच्या पोलिसांना माहिती द्यावी, असेही सांगण्यात आले आहे.
