पुणे : राज्यात बंदी असली तरी सध्या अनेक पान टपऱ्यांवर गुटखा, चरस यांसारख्या वस्तूंची बेकायदेशीर विक्री होत असल्याचे प्रकार समोर येत आहेत. यामध्ये आता गांजासारख्या अमली पदार्थांचाही समावेश होत असल्याचे स्पष्ट झाले आहे. खराडी पोलिसांनी अशाच एका पान टपरीवर छापा टाकून गांजा जप्त केला असून एका व्यक्तीस अटक करण्यात आली आहे.
खराडी परिसरातील शिव पान शॉपमधून गांजाची विक्री सुरू असल्याची माहिती पोलिसांना मिळाली होती. त्यानुसार पोलिसांनी छापा टाकून पान टपरी चालकाला ताब्यात घेतले. अटकेतील व्यक्तीचे नाव प्रमाकुमार मनमुलाल दिवेदी (वय 44, रा. विमाननगर, मूळ रा. मंजरपुर, जि. कौसांबी, उत्तर प्रदेश) असे आहे. याबाबत पोलिस अंमलदार श्रीकांत कोदगे यांनी खराडी पोलिस ठाण्यात फिर्याद दिली आहे.
पोलिस निरीक्षक विजयजित जगताप, सहाय्यक पोलिस निरीक्षक ख्वाईद गोदसे, हवालदार साबळे, श्रीकांत कोदगे, जाधव, श्रीमाने हे शनिवारी रात्री पेट्रोलिंग करत होते. त्यावेळी त्यांना शिव पान शॉपमध्ये गांजाची विक्री चालत असल्याचे समजले. त्यानुसार सहाय्यक पोलिस निरीक्षक ख्वाईद गोदसे यांनी पान टपरी चालक प्रमाकुमार दिवेदी याची चौकशी केली असता त्याने गांजाची विक्री सुरू असल्याचे कबूल केले.
टपरीची झडती घेतली असता प्लास्टिक पिशवीत ठेवलेला हिरवट रंगाचा पालापाचोळ्यासारखा दिसणारा पदार्थ आढळला. प्राथमिक तपासणीत तो गांजा असल्याचे निष्पन्न झाले. एकूण 100 ग्रॅम इतका गांजा पोलिसांनी जप्त केला. त्याची किंमत सुमारे 12,668 रुपये एवढी असल्याचे सांगण्यात आले. याशिवाय पोलिसांनी गांजा, मोबाईल असा एकूण 12,668 रुपयांचा मुद्देमाल जप्त केला आहे. खराडी पोलिसांनी गुन्हा नोंदवून आरोपी प्रमाकुमार दिवेदीला अटक केली असून पुढील तपास सहाय्यक पोलिस निरीक्षक ख्वाईद गोदसे करीत आहेत.
