सातारा : पुण्यातील पोर्शे कार (Pune News) अपघातानंतर बांधकाम व्यावसायिक विशाल अग्रवाल हे चांगलेच चर्चेत आले होते. आता पुन्हा एकदा महाबळेश्वर येथील हॉटेल ‘MPG Club’ मुळे ते चर्चेत आले आहेत. सातारा जिल्हा प्रशासनाने नुकताच एक आदेश जारी करत शासकीय जागेवर उभं असलेलं अनाधिकृत एमपीजी क्लब (MPG club) पुन्हा अग्रवाल कुटुंबाच्या ताब्यात दिलं आहे.
काय आहे ‘MPG Club’ प्रकरण?
अग्रवाल कुटुंबाने हे हॉटेल शासकीय मालकीच्या जमिनीवर उभारले असून, नियमानुसार, ही जागा तीस वर्षांच्या भाडेतत्त्वावर केवळ रहिवासी वापरासाठी किंवा मूळ जिमखाना या प्रयोजनासाठी घेण्यात आली होती. परंतु, सर्व नियम मोडून आणि प्रशासनाची फसवणूक करत या जागेवर पंचतारांकित हॉटेल उभे करण्यात आले. यानंतर एक वर्षापूर्वी प्रशासनाने कारवाई करत हे हॉटेल सील केले होते. मात्र, आता या हॉटेलचे सील हटवून हे हॉटेल पुन्हा अग्रवाल कुटुंबाच्या ताब्यात देण्यात आले आहे.
जिल्हा प्रशासनाच्या या निर्णयानंतर आता उलटसुलट चर्चा सुरू झाल्या असून, या निर्णयामागे जिल्हा प्रशासनावर मोठा राजकीय दबाव होता का? तसेच राजकीय दबावामागे कोणत्या नेत्याचा हात आहे का? असे प्रश्न उपस्थित केले जात आहेत.
दरम्यान, सातारा जिल्हाधिकाऱ्यांनी हॉटेल सीलमुक्त करण्याचे आदेश देत म्हटले आहे की, या प्रॉपर्टीमधील वाणिज्य वापर तात्काळ बंद करण्यात यावा. तसेच, या मिळकतीचा वापर केवळ मूळ जिमखाना या प्रयोजनासाठीच केला जावा. यासोबतच, भविष्यात वापर बदलण्यासाठी अग्रवाल कुटुंबाला महाराष्ट्र शासनाच्या संबंधित विभागांची परवानगी घेणे बंधनकारक असेल, असे आदेशात नमूद केलं आहे.
