पुणे : महाराष्ट्र राज्य ऑलिम्पिक असोसिएशनची निवडणूक यावेळी राष्ट्रवादी काँग्रेस विरुद्ध भाजप अशी होणार आहे. उपमुख्यमंत्री अजित पवार मागील तीन टर्मपासून MOA च्या अध्यक्षपदावर कार्यरत आहेत आणि आता त्यांना केंद्रीय नागरी विमान वाहतूक राज्यमंत्री मुरलीधर मोहोळ यांनी आव्हान दिले आहे.
अजित पवार यांनी अध्यक्षपदासाठी उमेदवारी अर्ज दाखल करत चौथ्यांदा या पदासाठी निवडणूक लढवत आहेत. तर मुरलीधर मोहोळ आज अध्यक्षपदासाठी अर्ज सादर करणार आहेत. यासंबंधीची माहिती महाराष्ट्र राज्य कुस्तीगीर संघाचे कार्याध्यक्ष आणि भाजप क्रीडा आघाडीचे अध्यक्ष संदीप भोंडवे यांनी दिली आहे.
महाराष्ट्र ऑलिम्पिक संघटनेची निवडणूक 2 नोव्हेंबर रोजी होणार असून, यावेळी ही निवडणूक बिनविरोध होण्याची शक्यता कमी आहे. दरम्यान, भारतीय ऑलिम्पिक संघटनेच्या घटनेनुसार आणि नवीन स्पोर्ट्स कोडनुसार, तीन टर्म अध्यक्षपद भूषवल्यानंतर चौथ्यांदा अध्यक्ष होता येत नाही. अशातच अजित पवार चौथ्यांदा निवडणूक लढवत असल्याने हे कृत्य भारतीय ऑलिम्पिक संघटनेच्या नियमानुसार बेकायदा ठरण्याची शक्यता वर्तवली जात आहे. सध्या महाराष्ट्र राज्य ऑलिम्पिक असोसिएशनच्या या निवडणुकीकडे क्रीडा आणि राजकीय वर्तुळाचे लक्ष लागून राहिले आहे.
