पुणे : आगामी स्थानिक स्वराज्य संस्थांच्या निवडणुका जवळ आल्या असतानाच, पुण्यात (Pune) राजकीय घडामोडींना वेग आला आहे. राष्ट्रवादी काँग्रेसच्या दोन्ही गटांना मोठा धक्का देत, पुणे जिल्ह्यातील सुमारे ३४ कार्यकर्त्यांनी भाजपमध्ये प्रवेश केला आहे. या पक्षप्रवेशामुळे भाजपची ताकद लक्षणीयरीत्या वाढली असल्याचं बोललं जात आहे.

मावळमधील अनेक महत्त्वाचे चेहरे भाजपच्या गळाला लागले आहेत. मावळ कृषी उत्पन्न बाजार समितीचे संचालक, खरेदी-विक्री संघाचे संचालक, माजी नगराध्यक्ष, नगरसेवक आणि उपनगराध्यक्षांनी भाजपमध्ये प्रवेश केला आहे. याशिवाय, पुणे जिल्हा परिषद, लोणावळा, तळेगाव दाभाडे आणि देहू नगरपरिषदेमधील काही पदाधिकाऱ्यांनीही भाजपची वाट धरली आहे.
तर मावळमधील अजित पवार गटाचे आमदार सुनील शेळके यांच्यासोबत असलेले काही प्रमुख पदाधिकारीही आता भाजपमध्ये सामील झाले आहेत. यामुळे आगामी निवडणुकांमध्ये मावळमध्ये भाजप आणि राष्ट्रवादी काँग्रेसमध्ये मोठी चुरस पाहायला मिळेल हे नक्की.

दरम्यान, हा पक्षप्रवेश सोहळा मुंबईत पार पडला असून, भाजपचे प्रदेशाध्यक्ष रवींद्र चव्हाण यांच्या उपस्थितीत हा कार्यक्रम झाल्याचं सांगण्यात येत आहे.







