Pune News पुणे : तरुणाच्या अपघाती निधनानंतर दुचाकीचा विमा नसल्याचा दावा करणाऱ्या कंपनीला मोटार अपघात न्यायाधिकरणाने तरुणाच्या कुटुंबीयांना ११ लाख रुपयांची नुकसान भरपाई मंजूर केली.
याप्रकरणी अजितकुमार गंगाधर ढमाळ यांच्या कुटुंबीयांनी अक्षय नाडकर, अक्षय भारणे आणि संबंधित विमा कंपनीविरोधात नुकसान भरपाई मिळण्यासाठी दावा दाखल केला होता. ढमाळ यांच्या कुटुंबीयांनी ॲड. लिखित गांधी यांच्यामार्फत न्यायाधिकरणात धाव घेतली होती. न्यायाधिकरणाचे सदस्य जे. जी. डोरले यांनी या प्रकरणी निकाल दिला आहे.
ढमाळ २५ ऑक्टोबर २०१७ रोजी सहकारनगरमधील शिंदे हायस्कूलजवळून दुचाकीवरून जात असताना अक्षय नाडकर यांनी त्यांना जोरात धडक दिली. यात गंभीर जखमी झालेल्या ढमाळ यांचा ८ नोव्हेंबर २०१८ रोजी उपचारादरम्यान मृत्यू झाला. त्यामुळे ढमाळ यांच्या पत्नी शैलजा आणि मुलाने उपचाराचा खर्च आणि नुकसानभरपाई मिळविण्यासाठी मोटार अपघात न्यायाधिकरणाकडे दावा दाखल केला होता. न्यायाधिकरणाने दोन्ही बाजूंचे म्हणणे ऐकून विमा कंपनीचा बचाव फेटाळला.
विमा कंपनीचा दावा काय ?
अपघाताच्या दिवशी नाडकर यांच्या दुचाकीची आरटीओ येथे नोंदणी झालेली नव्हती; तसेच, त्या दिवशी त्यांनी विमा पॉलिसीही काढलेली नव्हती, असा पवित्रा स्वीकारून विमा कंपनीने भरपाई देण्यास नकार दिला होता. दुचाकीला तात्पुरता ‘नोंदणी क्रमांक’ होता आणि त्यानंतर पुणे ‘आरटीओ’कडून कायमचा (पक्का) नोंदणी क्रमांकही घेतला होता.
फिर्यादींचा युक्तिवाद काय?
अर्जदारांनी पोलिस ठाण्यातून घेतलेली विमा पॉलिसीची माहिती आणि विमा कंपनीने सादर केली पॉलिसी यामध्ये पॉलिसी नंबर, गाडी नंबर, चॅसी नंबर आणि इंजिन नंबर एकच होता. केवळ विम्याच्या मुदतीमध्ये फेरफार करून बदललेल्या तारखेची विमा पॉलिसी कंपनीने न्यायाधिकरणाकडे दाखल केली, असा युक्तिवाद ॲड. लिखित गांधी यांनी केला. तो ग्राह्य धरण्यात आला.
