पुणे: इंजिनियरिंग क्षेत्रातील विद्यार्थ्यांसाठी आनंदाची बातमी आहे. पुणे महानगर पालिकेमार्फत (Pune Mahanagarpalika Jobs) इंटर्नशिपची (Pune Jobs) सुवर्णसंधी उपलब्ध करून देण्यात आली आहे. सन 2025-26 या आर्थिक वर्षात केंद्रीय गृहनिर्माण आणि नगरविकास मंत्रालयाच्या TULIP (The Urban Learning Internship Program) या उपक्रमांतर्गत इंटर्नशिपसाठी पात्र उमेदवारांकडून अर्ज मागविण्यात आले आहेत. अभियांत्रिकी शिक्षण घेत असलेल्या विद्यार्थ्यांसाठी ही उत्तम करिअरची संधी ठरणार आहे.
महानगर पालिकेमध्ये एका वर्षाच्या करारावर ही इंटर्नशिप दिली जाणार आहे. या भरतीत चार प्रकारच्या पदांचा समावेश आहे – अभियांत्रिकी इंटर्न (स्थापत्य), अभियांत्रिकी इंटर्न (विद्युत), पदवीधर इंटर्न (B.Com) आणि माळी (Gardener). एकूण 255 पदांसाठी ही भरती होणार असून अर्ज करण्याची अंतिम तारीख 4 नोव्हेंबर 2025 निश्चित करण्यात आली आहे. त्यामुळे इच्छुक उमेदवारांनी विलंब न करता अर्ज करणे आवश्यक आहे.
अभियांत्रिकी (स्थापत्य) इंटर्न पदासाठी उमेदवारांकडे कोणत्याही मान्यताप्राप्त विद्यापीठाची BE/B.Tech (Civil) पदवी असणे आवश्यक आहे. विद्युत अभियांत्रिकी इंटर्न पदासाठी BE/B.Tech (Electrical) पदवी आवश्यक आहे. पदवीधर इंटर्न (B.Com) पदासाठी उमेदवारांकडे B.Com पदवी असावी, तर माळी पदासाठी किमान दहावी उत्तीर्ण असणे आवश्यक आहे.
या इंटर्नशिपसाठी सविस्तर माहिती, मार्गदर्शक तत्वे आणि अर्ज प्रक्रिया [https://internship.aicte-india.org/](https://internship.aicte-india.org/) या संकेतस्थळावर उपलब्ध आहे. अर्ज करण्यासाठी उमेदवारांनी थेट [https://internship.aicte-india.org/fetch_ubl1.php](https://internship.aicte-india.org/fetch_ubl1.php) या लिंकवर जाऊन अर्ज सादर करावा. फक्त या अधिकृत संकेतस्थळावरूनच अर्ज स्वीकृत केले जाणार असून इतर कोणत्याही मार्गाने पाठविलेले अर्ज ग्राह्य धरले जाणार नाहीत, असे महानगर पालिकेने स्पष्ट केले आहे.
मानधनाच्या बाबतीत, सिव्हिल इंजिनियर, इलेक्ट्रिकल इंजिनियर आणि पदवीधर इंटर्न (B.Com) या पदांसाठी दरमहा 15,000 रुपये मानधन मिळणार आहे, तर माळी पदासाठी दरमहा 6,000 रुपये मानधन देण्यात येईल. त्यामुळे इंटर्नशिपसह प्रत्यक्ष अनुभव मिळवू इच्छिणाऱ्या विद्यार्थ्यांसाठी ही एक उत्तम संधी आहे.
