Pune : कोथरुड, कर्वेनगर आणि वारजे परिसरासाठी प्रस्तावित मेट्रो लाईन 4 आणि 4ए प्रकल्पाचे सादरीकरण नागरिकांसमोर करण्यात आले. या कार्यक्रमात चंद्रकांत पाटील यांनी मेट्रो हा पुणेकरांच्या दैनंदिन जीवनाचा भाग बनत असल्याचे सांगितले.
2016 मध्ये पुण्यात मेट्रो प्रकल्पाची सुरुवात झाली होती. सध्या सुरू असलेल्या मार्गिका आणि वाढत्या प्रवासी प्रतिसादामुळे मेट्रोला शहराच्या वाहतूक व्यवस्थेत महत्त्वाचे स्थान मिळाल्याचे पाटील यांनी नमूद केले. महाराष्ट्र मेट्रो रेल कॉर्पोरेशन लिमिटेड चे व्यवस्थापकीय संचालक श्रावण हर्डीकर यांनी प्रकल्पाची सद्यस्थिती आणि प्रस्तावित लाईन 4 व 4ए याबाबत माहिती दिली.
लाईन 4 ही खराडी ते खडकवासला दरम्यान धावणार असून तिची लांबी 25.52 किमी असेल आणि या मार्गावर 22 स्थानके असतील. लाईन 4ए नळ स्टॉप, वारजे आणि माणिक बाग परिसराला जोडेल. दोन्ही मार्गिका मिळून एकूण लांबी 31.636 किमी असून एकूण 28 स्थानके प्रस्तावित आहेत.
या प्रकल्पामुळे कर्वेनगर, वारजे आणि कोथरुड परिसरातील वाहतूक सुलभ होण्याची अपेक्षा आहे. मेट्रो प्रशासनाने हा प्रकल्प पुढील 4 वर्षांत पूर्ण करण्याचे उद्दिष्ट ठेवले आहे. तसेच लास्ट माईल कनेक्टिव्हिटीसाठी शटल बस आणि प्रीपेड रिक्षा सेवा सुरू असल्याची माहिती देण्यात आली.
