Pune fire : पुण्यातील सरकारी आरोग्य सेवेसाठी महत्त्वाचे मानले जाणारे ससून सर्वोपचार रुग्णालय सोमवारी संध्याकाळी काही काळ गोंधळात सापडले. रुग्णालयातील मेल जनरल वॉर्डमध्ये अचानक आग लागल्याने धावपळ उडाली; मात्र कर्मचाऱ्यांची आणि अग्निशमन दलाची तत्परता यामुळे मोठा अनर्थ टळला. सुदैवाने या घटनेत कोणतीही जीवितहानी किंवा जखमी झाल्याची नोंद नाही.
मिळालेल्या माहितीनुसार, ग्राउंड प्लस 2 मजली इमारतीच्या ग्राउंड फ्लोअरवरील सिस्टर रूमच्या वरच्या पोटमाळ्यावर ही आग लागली. त्या ठिकाणी वॉर्डसाठी लागणारे साहित्य ठेवले होते. यात रजिस्टर, पुस्तके, काही औषधे आणि व्हीलचेअर यांसारख्या वस्तूंचा समावेश होता. सुरुवातीला धूर दिसताच सुरक्षा रक्षक आणि रुग्णालयातील कर्मचाऱ्यांनी तातडीने ABCD प्रकारच्या फायर एक्स्टिंग्विशरचा वापर करून आग नियंत्रणात आणण्याचा प्रयत्न केला.
घटनेच्या वेळी वॉर्डमध्ये सुमारे 70 रुग्ण उपचार घेत होते. परिस्थिती गंभीर होण्याची शक्यता लक्षात घेऊन रुग्णालय प्रशासनाने तातडीने सर्व रुग्णांना सुरक्षित ठिकाणी हलवले. दरम्यान, अग्निशमन दलाचे पथक घटनास्थळी दाखल झाले आणि पाण्याच्या जेट व स्प्रेच्या साहाय्याने आगीवर पूर्ण नियंत्रण मिळवले.
या घटनेमुळे रुग्णालयांमधील अग्निसुरक्षा व्यवस्थेचे महत्त्व पुन्हा अधोरेखित झाले आहे. मोठ्या सरकारी रुग्णालयांमध्ये दररोज शेकडो रुग्ण ये-जा करतात, त्यामुळे अशा ठिकाणी नियमित फायर ऑडिट आणि सुरक्षेची काटेकोर अंमलबजावणी आवश्यक आहे. आगीचे नेमके कारण अद्याप स्पष्ट झाले नसून प्रशासनाने तपास सुरू केला आहे.
