लोणी काळभोर, ता. ७ : हडपसर परिसरातील २८ वर्षीय धनराज जयवंत पिसाळ यांच्या संशयास्पद मृत्यूप्रकरणाला गंभीर वळण लागले आहे. मालमत्ता, पेट्रोल पंप, आर्थिक व्यवहार आणि कौटुंबिक वादातून सातत्याने होत असलेल्या धमक्या व अपमानामुळे धनराज यांनी विषप्राशन करून आत्महत्या केल्याचा आरोप त्यांच्या आई आशा पिसाळ यांनी केला आहे. या प्रकरणी नऊ जणांविरोधात आत्महत्येस प्रवृत्त केल्याप्रकरणी तक्रार दाखल करण्यात आली असून पोलिसांनी तपास सुरू केला आहे.
धनराज पिसाळ असे आत्महत्या केलेल्या तरुणाचे नाव आहे. तर सतीश हरिश्चंद्र पिसाळ, हरिश्चंद्र महिपती पिसाळ, अंजना हरिश्चंद्र पिसाळ, आशा सतीश पिसाळ, विश्वनाथ सखाराम दगडे, ज्ञानराज विश्वनाथ दगडे, अनिता विश्वनाथ दगडे, राजेंद्र (आप्पा) भिलारे आणि विनायक पिसाळ असे गुन्हा दाखल करण्यात आलेल्यांची नावे आहेत. याप्रकरणी धनराजची आई आशा पिसाळ यांनी मांजरी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, धनराज पिसाळ हे ३ जुलै रोजी सकाळी घरातून बाहेर पडले होते. रात्री उशिरापर्यंत ते परत न आल्याने नातेवाईकांनी हडपसर पोलीस ठाण्यात बेपत्ता असल्याची तक्रार दाखल केली. दुसऱ्या दिवशी पुणे-सोलापूर रस्त्यावरील लक्ष्मी कॉलनी चौकाजवळील गंधर्व लॉजमध्ये ते बेशुद्ध अवस्थेत आढळले. त्यांना तातडीने ससून रुग्णालयात दाखल करण्यात आले; मात्र डॉक्टरांनी उपचारापूर्वीच मृत घोषित केले. शवविच्छेदन अहवालात मृत्यूचे अंतिम कारण न्यायवैद्यक प्रयोगशाळेच्या (एफएसएल) विषतपासणी अहवालानंतर स्पष्ट होणार असल्याचे नमूद करण्यात आले आहे.
बारामती तालुक्यातील माळवाडी परिसरातील जमिनी, पेट्रोल पंप, घर, गोदामे, वाहने तसेच आर्थिक व्यवहारांवरून गेल्या काही वर्षांपासून गंभीर वाद सुरू होते. फिर्यादी आशा पिसाळ यांच्या पतीच्या निधनानंतर संबंधितांनी जमीन व मालमत्ता बळकावल्याचा, आर्थिक फसवणूक केल्याचा तसेच वारंवार जीवे मारण्याच्या धमक्या देऊन कुटुंबाचा अपमान केल्याचा आरोप त्यांनी केला आहे. या सर्व घटनांमुळे धनराज प्रचंड मानसिक तणावाखाली गेले होते. लग्नसमारंभात सार्वजनिकरीत्या अपमानित केल्याची घटना आणि त्याआधी झालेल्या धमक्यांमुळे त्यांनी टोकाचे पाऊल उचलल्याचा कुटुंबीयांचा दावा आहे.
या प्रकरणी सतीश हरिश्चंद्र पिसाळ, हरिश्चंद्र महिपती पिसाळ, अंजना हरिश्चंद्र पिसाळ, आशा सतीश पिसाळ, विश्वनाथ सखाराम दगडे, ज्ञानराज विश्वनाथ दगडे, अनिता विश्वनाथ दगडे, राजेंद्र (आप्पा) भिलारे आणि विनायक पिसाळ या नऊ जणांविरोधात गुन्हा दाखल करण्यात आला आहे. आरोपांची पडताळणी सुरू असून शवविच्छेदन अहवाल, विषतपासणी अहवाल आणि अन्य पुराव्यांच्या आधारे पोलिसांकडून पुढील कायदेशीर कारवाई केली जाणार आहे.
