Yawat : घराचे बांधकाम सुरू असताना “हे बांधकाम आमच्या जागेत आले आहे,” असे म्हणत दोघांनी कुटुंबीयांना व त्याच्या नातेवाईकांना लाकडी काठीने व हाताने बेदम मारहाण केली. वरवंड (ता. दौंड) गावच्या हद्दीतील विजयनगर परिसरात मंगळवारी (ता.14) सायंकाळी 5 वाजण्याच्या सुमारास हि घटना घडली.
ज्ञानदेव महादेव पाटील, राहुल महादेव पाटील (दोन्ही रा. वरवंड, ता. दौंड) असे मारहाण करणाऱ्या दोघांची नावे आहेत. याप्रकरणी संगेश अरुण यादव (वय -38, व्यवसाय नोकरी, रा. वरवंड, विजयनगर, ता. दौंड) असे मारहाण झालेल्या व्यक्तीचे नाव आहे. याप्रकरणी यादव यांनी यवत पोलीस ठाण्यात फिर्याद दिली आहे. त्यानुसार वरील दोघांवर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी संगेश यादव यांच्या घराचे बांधकाम सध्या सुरू आहे. मंगळवारी सायंकाळी पाच वाजण्याच्या सुमारास आरोपी ज्ञानदेव पाटील आणि राहुल पाटील हे बांधकामाच्या ठिकाणी आले. “तुमचे बांधकाम आमच्या जागेत आले आहे,” असे म्हणत त्यांनी वादाला सुरुवात केली.
संगेश यादव हे आरोपींना समजावून सांगण्याचा प्रयत्न करत असतानाच, आरोपींनी त्यांना अश्लील शिवीगाळ करण्यास सुरुवात केली. वादाचे रूपांतर हाणामारीत झाले आणि आरोपी ज्ञानदेव पाटील यांनी संगेश यांना हाताने तसेच लाकडी काठीने मारहाण करण्यास सुरुवात केली. पतीला मारहाण होत असल्याचे पाहून संगेश यांच्या पत्नी प्रतिभा यादव, मावशी जयश्री पवार आणि मावस भाऊ आकाश पवार हे भांडण सोडवण्यासाठी मध्यस्थी करायला आले.
मात्र, आरोपींनी त्यांनाही सोडले नाही. दोन्ही आरोपींनी या तिघांनाही हाताने मारहाण करत शिवीगाळ व दमदाटी केली. संगेश यादव यांनी दिलेल्या फिर्यादीवरून यवत पोलिसांनी ज्ञानदेव पाटील व राहुल पाटील यांच्याविरुद्ध विविध कलमान्वये गुन्हा दाखल केला आहे. तपास पोलीस हवालदार बंडगर करीत आहेत.
