यवत, ता. 06 : खुटबाव–यवत सार्वजनिक रस्त्याच्या कडेला कोंबड्यांचा कुजका कचरा टाकून आरोग्य धोक्यात आणणाऱ्या दोन परप्रांतीय इसमांविरोधात यवत पोलीस ठाण्यात गुन्हा दाखल केला आहे. ग्रामस्थांच्या सतर्कतेमुळे हा प्रकार उघडकीस आला. खुटबाव (ता. दौंड) ग्रामपंचायत हद्दीतील सार्वजनिक रस्त्याच्या कडेला बुधवारी (ता. 04) रात्री नऊ वाजण्याच्या सुमारास हि घटना उघडकीस आली.
प्रोशांता मनिद्रनाथ देय (वय 58), व राहुल हजरापोदो सरदार (वय 20) रा. दोघे सद्या रा. येळे वस्ती, देलवडी ता. दौंड), मुळ रा. बेलडेना तळशीबागांन मचलागपर उत्तर परगांना पश्चिम बंगाल) असे गुन्हा दाखल करण्यात आलेल्या दोघांची नावे आहेत. याप्रकरणी यवत पोलीस ठाण्यातील पोलीस हवालदार परशुराम किसन काळेल यांनी यवत पोलीस ठाण्यात सरकारतर्फे फिर्याद दिली आहे.
पोलिसांनी दिलेल्या माहितीनुसार, बुधवारी (ता. 04) संध्याकाळी नऊ वाजण्याच्या सुमारास डायल 112 वर खुटबाव येथील पोलीस पाटील पूनम नरेश चव्हाण यांनी फोन करून माहिती दिली की, गायराण मोहरी येथील पवार वस्ती जवळ खुटबाव–यवत सार्वजनिक रस्त्याच्या कडेला दोन अनोळखी इसम तीनचाकी टमटममधून कोंबड्यांचा घाण कचरा टाकत आहेत. ग्रामस्थांनी त्यांना रोखून धरले आणि पोलिसांच्या मदतीची मागणी केली.
सदरची माहिती मिळताच यवत पोलीस ठाण्याचे पोलीस अंमलदार परशुराम काळेल व पोलीस हवालदार ए. एम. काळे यांनी तत्काळ घटनास्थळी धाव घेतली. त्यावेळी पोलीस पाटील पूनम चव्हाण यांच्यासह ग्रामस्थ निखिल थोरात, प्रमोद पासलकर, दीपक नेटके, सुधीर थोरात व इतर नागरिकांनी दोन इसमांना पकडून ठेवले होते. पोलिसांनी टमटमची तपासणी केली असता वाहनाच्या मागील हौदात गोण्या भरून कोंबड्यांची कातडी, पिसे आणि कुजका कचरा आढळून आला. या कचऱ्याला पाणी सुटून तीव्र दुर्गंधी पसरली होती. काही कचरा रस्त्याच्या कडेलाही टाकण्यात आल्याचे निदर्शनास आले.
दरम्यान, यवत पोलीस ठाण्यातील पोलिसांनी दोन्ही इसमांना ताब्यात घेऊन चौकशी केली असता त्यांनी नावे प्रोशांता देय व राहुल सरदार अशी सांगितली. या प्रकरणी यवत पोलीस ठाण्यात भा.न्या.सं. कलम 271, 292, 3(5) अन्वये गुन्हा दाखल करण्यात आला असून पुढील तपास यवत पोलीस करत आहेत.
