पुणे: राजगड तालुक्यातील शिरकोली परिसरात डानंगे खिंड येथे एका महिलेला विहिरीत पडून आपला जीव गमवावा लागल्याची धक्कादायक घटना समोर आली आहे. रमाबाई मरगळे असे मृत्यूमुखी पडलेल्या महिलेचे नाव आहे.
प्राथमिक माहितीनुसार, सोमवारी सकाळच्या सुमारास रमाबाई मरगळे पाणी भरण्यासाठी विहिरीकडे गेल्या होत्या. पाणी भरताना अचानक त्यांचा पाय घसरला आणि त्या थेट विहिरीत पडल्या. त्यांना पोहता येत नसल्याने त्यांचा पाण्यात बुडून मृत्यू झाला.
काही वेळानंतर कुटुंबीयांनी रमाबाई यांचा शोध घेण्यास सुरुवात केली. त्यानंतर त्यांच्या विहिरीत पडल्याचा संशय बळावला. शोधादरम्यान मृतदेह पाण्यावर तरंगताना दिसून आला. यानंतर तात्काळ पोलिसांना घटनेची माहिती देण्यात आली.
पोलिसांनी घटनास्थळी धाव घेऊन पंचनामा केला असून, मृतदेह शवविच्छेदनासाठी स्थानिक रुग्णालयात पाठवण्यात आला आहे. या घटनेचा पुढील तपास पोलिस करीत आहेत.
