लोणी काळभोर, ता. १२ : सोलापूर-पुणे महामार्गावर भरधाव दुचाकीच्या धडकेत एका महिलेला गंभीर दुखापत झाल्याची घटना घडली आहे. हि घटना कदमवाकवस्ती (ता. हवेली) येथील दत्त मंदिरासमोर ६ जून रोजी रात्री सुमारे सव्वा आठ वाजण्याच्या सुमारास घडली आहे. धडक दिल्यानंतर कोणतीही मदत न करता दुचाकी चालक घटनास्थळावरून फरार झाला आहे.
दिपाली किरण आरदडे (वय २९) असे जखमी झालेल्या महिलेचे नाव आहे. याप्रकरणी दिपाली यांचे पती किरण सिताराम आरदडे (वय ३६, रा. कवडीपाट, लोणी काळभोर) यांनी लोणी काळभोर पोलीस ठाण्यात फिर्याद दिली आहे. त्यानुसार दुचाकीचालकाच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, किरण आरदडे हे प्लंबर म्हणून काम करतात. त्यांच्या पत्नी दिपाली आरदडे या घरकाम करून कुटुंबाचा उदरनिर्वाह करण्यास हातभार लावतात. दिपाली आरदडे या कामावरून घरी परतत असताना कदमवाकवस्ती येथील दत्त मंदिरासमोर सोलापूर-पुणे महामार्ग ओलांडत होत्या. त्यावेळी होंडा शाईन (एमएच १२ वायजी १३९५) या दुचाकीवरील चालकाने भरधाव वेगाने वाहन चालवत त्यांना जोरदार धडक दिली.
या अपघातानंतर एका अनोळखी व्यक्तीने फोन करून घटनेची माहिती त्यांच्या पती किरण आरदडे यांना दिली. ते तातडीने घटनास्थळी पोहोचले. जखमी दिपाली यांना रुग्णवाहिकेद्वारे पुण्यातील विश्वराज रुग्णालयात दाखल करण्यात आले. तपासणीत त्यांच्या डाव्या पायाची नडगी फ्रॅक्चर झाल्याचे निष्पन्न झाले. त्यांच्यावर शस्त्रक्रिया करून उपचार करण्यात आले.
दरम्यान, अपघात घडविणारा दुचाकी चालक जखमी महिलेला कोणतीही मदत न करता घटनास्थळावरून पसार झाला. वाहतुकीच्या नियमांकडे दुर्लक्ष करून निष्काळजीपणे वाहन चालवल्याचा आरोप त्याच्यावर करण्यात आला असून, लोणी काळभोर पोलिसांनी गुन्हा दाखल करण्यात आला आहे.
