केडगाव, ता. ४ : जमिनीच्या मोजणीच्या वादातून एका महिलेसह तिच्या मुलाला लाकडी दांडक्याने मारहाण करून जखमी केल्याची घटना बोरीपार्धी (ता. दौंड) येथे घडली. याप्रकरणी यवत पोलीस ठाण्यात एका व्यक्तीविरुद्ध गुन्हा दाखल करण्यात आला आहे.
याप्रकरणी पुनम सॅम्युअल वाघमारे (वय ४६, रा. बेथेल कॉलनी, बोरीपार्धी, ता. दौंड) यांनी फिर्याद दिली आहे. त्यानुसार सॅमसन जॉन वाघमारे (रा. बोरीपार्धी, रेल्वे स्टेशनजवळ, ता. दौंड) याच्याविरुद्ध भारतीय न्याय संहितेच्या कलम ११८(१) व ३५२ अन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, बोरीपार्धी गाव हद्दीतील गट क्रमांक ४१७ मधील सामाईक जमिनीवरून संबंधित कुटुंबांमध्ये वाद सुरू आहे. या जमिनीतील आपल्या वाट्याच्या चार गुंठे जागेची खासगी मोजणी करण्यासाठी पुनम वाघमारे या ३१ मे रोजी सायंकाळी साडेचारच्या सुमारास आपल्या मुलगा अनुग्रह याच्यासह मोजणी करणाऱ्या कर्मचाऱ्यांना घेऊन घटनास्थळी गेल्या होत्या.
यावेळी सॅमसन वाघमारे याने जमिनीची मोजणी करण्यास विरोध करत शिवीगाळ केली. त्यानंतर त्याने लाकडी दांडक्याने पुनम वाघमारे यांच्या डोक्यावर, डोळ्याजवळ, हात, कंबर व गुडघ्यावर मारहाण केली. तसेच त्यांचा मुलगा अनुग्रह यालाही हात, खांदा व मांडीवर मारहाण करून जखमी केले. एवढ्यावरच न थांबता त्याने अनुग्रहच्या उजव्या बगलेजवळ चावाही घेतल्याचे फिर्यादीत नमूद करण्यात आले आहे.
दरम्यान, या घटनेनंतर आई-मुलगा तक्रार देण्यासाठी केडगाव पोलीस चौकीत गेले. पोलिसांनी त्यांना वैद्यकीय तपासणीसाठी ग्रामीण रुग्णालय, यवत येथे पाठविले. उपचारानंतर त्यांनी अधिकृत तक्रार दाखल केली. या घटनेमुळे बोरीपार्धी परिसरात खळबळ उडाली असून, केवळ जमिनीच्या वादातून महिलेसह तिच्या मुलावर झालेल्या हल्ल्याबद्दल संताप व्यक्त केला जात आहे. पुढील तपास पोलीस हवालदार काळे करत आहेत.
