पुणे: आयटी क्षेत्रातील चकचकीत नोकऱ्यांकडे अनेक तरुण आकर्षित होतात. मात्र, उच्च पगार आणि आलिशान लाइफस्टाइलच्या या झगमगाटामागे कर्मचाऱ्यांची होणारी घुसमट आणि मानसिक छळ अनेकदा दुर्लक्षित राहतो. हिंजवडी येथील टीसीएस (TCS) कंपनीत कार्यरत असलेल्या 48 वर्षीय अमित अभय ब्रह्मे यांनी नुकतेच आत्महत्या करून आपले जीवन संपवल्याने या क्षेत्रातील कामाच्या पद्धतीवर प्रश्नचिन्ह निर्माण झाले आहे. कामाच्या ठिकाणी मिळणारी अपमानास्पद वागणूक आणि मानसिक जाच यामुळे त्यांनी हा टोकाचा निर्णय घेतल्याचे त्यांच्या कुटुंबीयांचे म्हणणे आहे.
या प्रकरणी मृत अमित यांच्या मुलाने भोसरी पोलीस ठाण्यात धाव घेत तक्रार नोंदवली आहे. या तक्रारीच्या आधारे, अमित यांना आत्महत्येसाठी प्रवृत्त केल्याप्रकरणी कंपनीतीलच विनोद जेठाल पालीचा, अर्चना आणि शाश्वती या तीन सहकाऱ्यांविरुद्ध पोलिसांनी गुन्हा दाखल केला आहे. अमित यांनी लिहिलेल्या सुसाईड नोटमध्ये काही सहकाऱ्यांनी आपल्याला मानसिकदृष्ट्या त्रास दिल्याचा उल्लेख असल्याचे समोर आले आहे.
अमित यांना गेल्या काही काळापासून वरिष्ठ आणि सहकाऱ्यांकडून नाहक त्रास दिला जात होता. त्यांच्या कामात त्रुटी काढणे, खोट्या तक्रारी करणे आणि सर्वांसमोर अपमान करणे, असा छळ सातत्याने सुरू होता. कॉर्पोरेट क्षेत्रातील अंतर्गत गटबाजी आणि कामाच्या वाढत्या दबावामुळे अमित पूर्णपणे खचले होते. आरोपींबद्दल गुन्हा दाखल करण्यात आला असून पोलीस उपनिरीक्षक केतन मांजरे या प्रकरणाचा पुढील तपास करत असून, दोषींवर कायदेशीर कारवाईची तयारी सुरू आहे.
