सातारा: राज्यात पदवीधर आणि शिक्षक मतदारसंघातील एकूण 5 जागांसाठी लवकरच निवडणूक होणार आहे. या निवडणुकीची तयारी सुरू असतानाच पुणे शिक्षक मतदारसंघाच्या अंतिम मतदार यादीतील एका नोंदीमुळे चर्चेला उधाण आले आहे. सातारा जिल्ह्याशी संबंधित मतदार यादीत एका मतदाराचे नाव आणि त्याच्या वडिलांच्या नावाची नोंद अत्यंत विचित्र असल्याचे समोर आले आहे.
या यादीतील संबंधित नोंद सोशल मीडियावर आणि राजकीय वर्तुळात चर्चेचा विषय ठरत आहे. मतदाराचे नाव ‘प्रशांत दादासाहेबांचे बॉम्बस्फोट’, तर वडिलांच्या नावाच्या रकान्यात ‘दादासाहेबांचा बॉम्ब’ अशी नोंद करण्यात आल्याचे सांगितले जात आहे. त्यामुळे ही नोंद मतदार यादीत कशी आली, याबाबत प्रश्न उपस्थित होत आहेत.
दरम्यान, मतदार यादीतील कथित त्रुटींविरोधात शिक्षक मतदारसंघातून निवडणूक लढवण्यास इच्छुक असलेल्या काही उमेदवारांनी थेट हायकोर्टात धाव घेतली आहे. त्यामुळे आगामी निवडणुकीच्या पार्श्वभूमीवर मतदार यादीचा मुद्दा अधिक गंभीर बनला आहे.
शिक्षक मतदारसंघातील मतदारांची संख्या सामान्य मतदारसंघांच्या तुलनेत मर्यादित असते. त्यासाठी मतदारांची पात्रताही ठरावीक निकषांनुसार निश्चित केली जाते. अशा परिस्थितीत चुकीची किंवा संशयास्पद नोंद यादीत आल्यास निवडणूक प्रक्रियेच्या अचूकतेबाबत प्रश्न निर्माण होणे स्वाभाविक आहे.
आधीच SIR प्रक्रियेवरून वाद सुरू असताना आता पुणे शिक्षक मतदारसंघाच्या मतदार यादीतील या नोंदीमुळे निवडणूक प्रक्रियेच्या पारदर्शकतेवर पुन्हा प्रश्न उपस्थित झाले आहेत.
