आदित्य बोराटे
इंदापूर: इंदापूर शहरासह परिसरात आज वटपौर्णिमा उत्सव मोठ्या उत्साहात आणि भक्तिभावाने साजरा करण्यात आला. सकाळपासूनच टेंभुर्णी नाका, अंबिका नगर, शासकीय विश्राम गृह, खुळे चौक,अकलूज नाका अशा विविध भागांतील वडाच्या वृक्षांजवळ महिलांनी पारंपरिक वेशभूषेत मोठी गर्दी केली होती. सुवासिनींनी वडाच्या वृक्षाची विधिवत पूजा करून त्याभोवती दोरे गुंडाळत पतीच्या दीर्घायुष्य, उत्तम आरोग्य आणि कुटुंबाच्या सुख-समृद्धीसाठी प्रार्थना केली.
हातात पूजेचे साहित्य, फुले, फळे व नैवेद्य घेऊन आलेल्या महिलांनी धार्मिक विधी पार पाडले. यावेळी वटसावित्रीची कथा श्रवण करून पारंपरिक पद्धतीने पूजा करण्यात आली. अनेक ठिकाणी महिलांनी एकमेकींना हळद-कुंकू लावत वटपौर्णिमेच्या शुभेच्छा दिल्या.
शहरातील टेंभुर्णी नाका येथील वडाच्या वृक्षांजवळ सकाळपासूनच महिलांची मोठी वर्दळ पाहायला मिळाली. यामुळे परिसरात भक्तिमय आणि उत्सवी वातावरण निर्माण झाले होते. नवविवाहित महिलांपासून ज्येष्ठ सुवासिनींपर्यंत सर्वच वयोगटातील महिलांनी उत्साहाने या धार्मिक परंपरेत सहभाग घेतला.
वटपौर्णिमेनिमित्त शहरातील फुलविक्रेते, पूजासाहित्य विक्रेते आणि फळ विक्रेत्यांकडेही चांगली गर्दी झाल्याने बाजारपेठेतही उत्साहाचे वातावरण पाहायला मिळाले.
