लोणी काळभोर, ता. २९ : सायबर गुन्हेगारांनी पाठविलेली एक APK फाईल उघडणे कदमवाकवस्ती येथील सफाई कामगार सागर विलास चव्हाण यांना चांगलेच महागात पडले. मुलांच्या शिक्षणासाठी काढलेल्या ९० हजार रुपयांच्या कर्जाची संपूर्ण रक्कम काही क्षणांत त्यांच्या बँक खात्यातून लंपास झाली. मात्र, लोणी काळभोर पोलिसांच्या सायबर तपास पथकाने तातडीने पाठपुरावा करत अवघ्या १५ दिवसांत ९० हजार रुपयांची संपूर्ण रक्कम परत मिळवून देण्याची उल्लेखनीय कामगिरी केली आहे.
सागर विलास चव्हाण (रा. घोरपडेवस्ती, कदमवाकवस्ती, ता. हवेली) हे हडपसर परिसरातील एका खासगी संस्थेत सफाई कामगार म्हणून काम करतात. मुलांच्या शिक्षणासाठी त्यांनी बँकेतून ९० हजार रुपयांचे कर्ज घेतले होते. मात्र, ९ जून रोजी त्यांच्या मोबाईलवर अज्ञात व्यक्तीकडून आलेली APK फाईल त्यांनी उघडताच मोबाईल काही काळासाठी बंद पडला. त्यानंतर त्यांच्या बँक खात्यातून ९० हजार रुपयांची रक्कम अनधिकृतरीत्या वळती करण्यात आली.
फसवणूक झाल्याचे लक्षात येताच चव्हाण यांनी तात्काळ महाराष्ट्र सायबर हेल्पलाईन १९३० वर तक्रार नोंदविली. त्यानंतर लोणी काळभोर पोलीस ठाण्यात ऑनलाईन सायबर तक्रार क्रमांक ३१९०४२६००७१०९३/२०२६ दाखल करण्यात आला. तक्रारीनंतर लोणी काळभोर पोलीस ठाण्याच्या सायबर तपास पथकाने तातडीने तपास सुरू केला. फसवणुकीतील ₹२०१ रक्कम ‘लीन’ अवस्थेत असल्याचे आढळून आल्यानंतर विविध बँका आणि संबंधित मर्चंटशी सातत्याने पत्रव्यवहार, समन्वय आणि पाठपुरावा करण्यात आला. या प्रयत्नांना यश येत फसवणुकीची संपूर्ण ९० हजार रुपयांची रक्कम अर्जदाराच्या खात्यात परत (Refund) मिळवून देण्यात आली.
ही उल्लेखनीय कारवाई वरिष्ठ पोलीस निरीक्षक प्रदीप पवार यांच्या मार्गदर्शनाखाली महिला पोलीस अंमलदार उषा थोरात आणि पोलीस अंमलदार योगेश पाटील यांनी सायबर तपास पथकाच्या माध्यमातून यशस्वीरीत्या पार पाडली.
दरम्यान, सायबर गुन्ह्यांमध्ये फसवणूक झाल्यास नागरिकांनी वेळ न दवडता १९३० हेल्पलाईनवर तक्रार नोंदवावी किंवा https://cybercrime.gov.in या पोर्टलवर तक्रार करावी, असे आवाहन लोणी काळभोर पोलिसांनी केले आहे. तातडीने तक्रार केल्यास फसवणुकीची रक्कम परत मिळण्याची शक्यता वाढते, असेही पोलिसांनी स्पष्ट केले.
