पुणे : सध्या अमेरिका आणि इराण यांच्यात वाढलेल्या तीव्र तणावामुळे भारतीय सराफा बाजारात सोन्याच्या दराने मोठी उसळी घेतली आहे. आंतरराष्ट्रीय बाजारात किंचित घट झाली असली, तरी भारतात सोन्या -चांदीच्या किमती वाढल्या आहेत.अवघ्या एका दिवसात सोन्याच्या दरात 1290 रुपयांची वाढ झाली आहे.24 कॅरेट सोने: 1,43,820 रुपये (कालच्या 1,42,530 रुपयांच्या तुलनेत 1290 रुपयांची वाढ) झाले आहे.
24 कॅरेटप्रमाणेच 22 आणि 18 कॅरेट सोन्याच्या दरातही आज वाढ नोंदवण्यात आली आहे. 22 कॅरेट सोन्याचा दर आज 1,31,843 रुपये प्रति 10 ग्रॅम झाला आहे, जो काल 1.30,653 रुपये होता. म्हणजेच त्यात 1190 रुपयांची वाढ झाली आहे. तर 18 कॅरेट सोन्याचा दर आज 1,07,865 रुपये प्रति 10 ग्रॅमवर पोहोचला आहे. कालच्या 1,06,893 रुपयांच्या तुलनेत यामध्ये 972 रुपयांची वाढ झाली आहे.
सोन्यापाठोपाठ चांदीतही तेजी आली असून कॉमेक्सवर ती 59.09 डॉलर प्रति औंस तर देशांतर्गत बाजारात 1.08%च्या वाढीसह 2.20 लाख रुपये प्रति किलोवर पोहोचली आहे.
इराकमधील इराणसमर्थित लष्करी गटांकडून अमेरिकेच्या लष्करी तळांवर आणि सौदी अरेबियातील तेल प्रकल्पांवर ड्रोन हल्ले करण्यात आले आहेत. याला प्रत्युत्तर म्हणून अमेरिकन सैन्याने इराकमध्ये मोठे हवाई हल्ले केले. या घटनेनंतर अमेरिकेचे राष्ट्राध्यक्ष डोनाल्ड ट्रम्प यांनी आणखी कठोर पावले उचलण्याचा कडक इशारा दिला आहे.
या युद्धजन्य परिस्थितीमुळे आंतरराष्ट्रीय पातळीवर भीतीचे वातावरण असून, सुरक्षित गुंतवणुकीसाठी मागणी वाढल्याने सराफा बाजारात ही दरवाढ होत आहे.
