कोल्हापूर : कोल्हापूरमध्ये बेकायदेशीर गर्भपात प्रकरणात मोठी कारवाई करण्यात आली आहे. करवीर पोलिसांनी एका निवृत्त सरकारी डॉक्टरच्या रुग्णालयावर छापा टाकून त्याला ताब्यात घेतले. प्राथमिक तपासात या डॉक्टरने गेल्या 2 वर्षांत सुमारे 300 गर्भपात केल्याचे समोर आले असून, या प्रकरणामुळे आरोग्य विभागात खळबळ उडाली आहे.
कोल्हापूरमध्ये आरोग्य सुविधा अधिक सक्षम करण्यासाठी राज्य सरकारकडून विविध पातळ्यांवर प्रयत्न सुरू आहेत. मात्र, दुसऱ्या बाजूला बेकायदेशीर गर्भपाताच्या रॅकेटची प्रकरणे समोर येत असल्याने चिंता वाढली आहे. अशा प्रकारच्या कारवायांमुळे आरोग्य व्यवस्थेवर प्रश्नचिन्ह निर्माण होत असून, संबंधित यंत्रणांकडून या प्रकरणांचा सखोल तपास सुरू आहे.
ताब्यात घेण्यात आलेल्या डॉक्टरचे नाव डॉ. चंद्रकांत गायकवाड असे आहे. ते आरोग्य विभागातून सहाय्यक संचालक पदावरून निवृत्त झाले होते. निवृत्तीनंतरही त्यांना नियमित पेन्शन मिळत असतानाही अधिक पैशाच्या मोहापोटी त्यांनी हा बेकायदेशीर व्यवसाय सुरू ठेवल्याचा आरोप आहे.
काही दिवसांपूर्वी करवीर पोलिसांनी कळंबा परिसरातील एका लॉजवर छापा टाकून महिला एजंटांना अटक केली होती. चौकशीदरम्यान गर्भलिंग निदानानंतर गर्भपातासाठी महिलांना डॉ. गायकवाड यांच्या रुग्णालयात पाठवले जात असल्याची माहिती समोर आली. त्यानंतर पोलिसांनी या प्रकरणाची गुप्तपणे चौकशी सुरू केली.
संपूर्ण प्रकार उघड करण्यासाठी पोलिसांनी एका महिलेला बनावट रुग्ण म्हणून रुग्णालयात पाठवले. तपासादरम्यान डॉक्टरांनी कोणतीही अधिकृत नोंद न करता तिची तपासणी केली. त्यानंतर गर्भपातासाठी औषध देऊन पुढील प्रक्रिया सुरू केली. ठरलेल्या इशाऱ्यानंतर पोलिसांनी तत्काळ छापा टाकून डॉक्टरला ताब्यात घेतले.
कारवाईदरम्यान पोलिसांनी रुग्णालयातून सोनोग्राफी मशीन, गर्भपातासाठी वापरली जाणारी औषधे आणि शस्त्रक्रियेची विविध उपकरणे जप्त केली. प्राथमिक तपासात प्रत्येक गर्भपातासाठी 20 ते 25 हजार रुपये घेतले जात असल्याची माहिती समोर आली आहे.
दरम्यान, पोलिसांनी छापा टाकल्यानंतर डॉक्टरांची प्रकृती बिघडल्याचे सांगण्यात आले. रक्तदाब आणि रक्तातील साखरेचे प्रमाण वाढल्याने त्यांना उपचारासाठी रुग्णालयात दाखल करण्यात आले. त्यामुळे त्यांची औपचारिक अटक अद्याप झालेली नाही. या प्रकरणाचा अधिक तपास करवीर पोलीस करत असून, या रॅकेटमध्ये आणखी कोणाचा सहभाग आहे का, याचाही शोध घेतला जात आहे.
