उरुळी कांचन (पुणे) : हद्दीत मागील सहा महिन्यांत हरवलेले किंवा गहाळ झालेले लाखो रुपयांचे मोबाईल शोधून काढण्यात उरुळी कांचन पोलिसांच्या सायबर विभागाला मोठे यश आले आहे.
उरुळी कांचन पोलीस ठाण्याच्या हद्दीतून नागरिकांचे गहाळ झालेले सुमारे 10 लाख 51 हजार रुपये किंमतीचे 38 मोबाईल उरुळी कांचन सायबर विभागाच्या पोलिसांनी तपास करत मूळ मालकांना मंगळवारी (ता. 29) परत दिले. पोलीस उपअधीक्षक बापूराव दडस यांच्या हस्ते हे सर्व मोबाईल संबंधित नागरिकांना हस्तांतरित करण्यात आले. आपला हरवलेला मोबाईल पुन्हा मिळाल्याने नागरिकांच्या चेहऱ्यावर आनंदाश्रू आणि समाधानाचे वातावरण पाहायला मिळाले.
उरुळी कांचन पोलीस ठाण्याच्या वरिष्ठ पोलीस निरीक्षक विजयमाला पवार यांनी याबाबत सायबर विभागाच्या पोलिसांना सूचना दिल्या होत्या. त्यानुसार पथकाने सीईआयआर पोर्टल व इतर तांत्रिक माहिती प्राप्त करून महाराष्ट्रातील व परराज्यातील मोबाईल मिळालेल्या लोकांशी नियमित संपर्क साधून गहाळ मोबाईल हस्तगत करण्यात यश मिळवले. ही संपूर्ण कामगिरी वरिष्ठ पोलीस निरीक्षक विजयमाला पवार यांच्या मार्गदर्शनाखाली पोलीस शिपाई प्रदीप शिवाजी बालगुडे यांनी केली आहे.
पोलिसांनी दिलेल्या माहितीनुसार, एप्रिल ते सप्टेंबर 2026 या सहा महिन्यांच्या कालावधीत उरुळी कांचन परिसरातून विविध नागरिकांचे मोबाईल गहाळ झाले होते. या प्रकरणी सायबर विभागाकडे तक्रारी दाखल झाल्यानंतर तांत्रिक तपासाच्या आधारे मोबाईलचा माग काढण्यास सुरुवात झाली होती.
विशेष म्हणजे, पोलीस शिपाई प्रदीप बालगुडे यांनी भारतीय सैन्य दलात 17 वर्षे देशसेवा केली आहे. सैन्यदलातून निवृत्त झाल्यानंतर ते गेली 4 वर्षे महाराष्ट्र पोलीस दलात सेवा बजावत आहेत. सध्या ते उरुळी कांचन पोलीस ठाण्यातील सायबर विभाग आणि गुन्हे प्रकटीकरण शाखेत तत्परतेने आपले कर्तव्य पार पाडत आहेत. त्यांच्या या तांत्रिक कौशल्यामुळेच 10 लाख 51 हजारांचे 38 मोबाईल हस्तगत करण्यात यश आले.
दरम्यान, आपले महागडे आणि महत्त्वाची माहिती असलेले मोबाईल पुन्हा सुखरूप हातात मिळाल्यानंतर उपस्थित नागरिकांनी उरुळी कांचन पोलीस ठाणे, वरिष्ठ पोलीस निरीक्षक विजयमाला पवार आणि विशेषतः पोलीस शिपाई प्रदीप बालगुडे यांचे मनापासून आभार मानले. पोलिसांच्या या तत्पर आणि कौतुकास्पद कामगिरीचे संपूर्ण परिसरातून अभिनंदन होत आहे.
