न्हावरे: करडे (ता.शिरूर) परिसरातील देशमुखवस्ती येथील बाभूळसर ते करडे रस्त्यावर एका गैरसमजातून तरुणाला रात्रीच्या वेळी अडवून लाकडी काठीने तसेच लाथाबुक्क्यांनी मारहाण केल्याची घटना गुरुवारी (ता.२२) रात्री आठ वाजण्याच्या सुमारास घडली. या प्रकरणी रोहन सुनील तांबे आणि ओमकार विपिन तांबे (दोघेही रा. पारगाव,शिंदेवाडी, ता. दौंड, जि.पुणे) यांच्याविरुद्ध शिरूर पोलीस ठाण्यात गुन्हा दाखल करण्यात आला आहे.
याप्रकरणी जिल्हा परिषदेच्या माजी सदस्या मंदाताई उमाजी सरके यांचे पुत्र शेखर उमाजी सरके (वय २८, व्यवसाय शेती, रा. न्हावरे, ता.शिरूर, जि.पुणे) यांनी शिरूर पोलिस ठाण्यात फिर्याद दाखल केली आहे.
या घटनेची पोलिसांनी दिलेली माहिती अशी की, गुरुवारी (ता.२२) रात्री आठ वाजण्याच्या सुमारास करडे गावच्या परिसरातील देशमुखवस्ती येथील बाभूळसर-करडे रस्त्यावर ही घटना घडली. फिर्यादी शेखर सरके यांना एका गैरसमजातून आरोपींनी अडविल्याचे फिर्यादीत नमूद करण्यात आले आहे. यावेळी आरोपी रोहन तांबे याने लाकडी काठीने सरके यांच्या डोक्यावर, उजव्या हाताच्या कोपराजवळ आणि डाव्या पायाच्या गुडघ्याजवळ मारहाण करून दुखापत केली. तसेच, दोन्ही आरोपींनी सरके यांना हाताने व लाथाबुक्क्यांनी मारहाण करून शिवीगाळ केली आणि दमदाटीही केली. त्यामुळे या घटनेमुळे परिसरात वेगवेगळ्या चर्चा सुरू आहेत.
या प्रकरणी रविवारी (ता.२५) रात्री नऊ वाजण्याच्या दरम्यान शिरूर पोलीस ठाण्यात गुन्हा दाखल करण्यात आला असून, या घटनेचा पुढील तपास पोलिस उपनिरीक्षक राजेंद्र बनकर हे करीत आहेत.
