शिरूर : पुणे जिल्ह्यातील शिरूर तालुक्यात असलेल्या बुरुंजवाडी येथे एका 22 वर्षीय तरुणाचा मृत्यू झाल्याची दुर्दैवी घटना समोर आली आहे. ओम रामराव चव्हाण (वय 22, रा. बुरुंजवाडी, ता. शिरूर) असे मृत तरुणाचे नाव आहे. या घटनेमुळे गावात शोककळा पसरली असून परिसरातून हळहळ व्यक्त केली जात आहे. याप्रकरणी शिक्रापूर पोलीस ठाण्यात नोंद करण्यात आली आहे.

मिळालेल्या माहितीनुसार, ओम याला गावी जायचे होते. त्यासाठी त्याने आपले मामा राजू राठोड यांच्याकडे वाहनाची व्यवस्था करण्याची विनंती केली होती. भाच्याची इच्छा पूर्ण करण्यासाठी राजू राठोड हे रिक्षाची व्यवस्था करण्याकरिता शिक्रापूर येथे गेले. दरम्यान, ते घराबाहेर असतानाच ओमने राहत्या घरात आपले जीवन संपवले.
काही वेळाने मामा रिक्षा घेऊन घरी परतले. त्यावेळी घराचा दरवाजा आतून बंद असल्याचे त्यांच्या लक्षात आले. त्यांनी ओमला आवाज दिला तसेच मोबाईलवर संपर्क साधण्याचाही प्रयत्न केला. मात्र, त्याच्याकडून कोणताही प्रतिसाद मिळाला नाही. त्यामुळे राजू राठोड यांना संशय आला.

त्यानंतर त्यांनी दरवाजा उघडण्याचा प्रयत्न केला. मात्र, आतून कडी लावलेली असल्याने दरवाजा तोडून घरात प्रवेश करावा लागला. घरात ओमची अवस्था पाहून मामांना मोठा धक्का बसला. या घटनेची माहिती मिळताच त्यांनी तातडीने शिक्रापूर पोलीस ठाणे गाठून पोलिसांना संपूर्ण प्रकार सांगितला.
दरम्यान, ओमने हे टोकाचे पाऊल नेमके कोणत्या कारणातून उचलले, हे अद्याप स्पष्ट झालेले नाही. त्याच्या मृत्यूमागील कारणांचा शोध पोलीस घेत आहेत. शिक्रापूर पोलीस या प्रकरणाचा पुढील तपास करत असून अचानक घडलेल्या या घटनेमुळे बुरुंजवाडी परिसरात शोक व्यक्त केला जात आहे.







