गोरख जाधव
डोर्लेवाडी : बहुउद्देशीय सभागृह आणि सार्वजनिक महादेव मंदिराच्या जागेवरून गावात दोन गटांमध्ये सुरू असलेला वाद अद्याप मिटलेला नाही. शुक्रवारी ग्रामपंचायत कार्यालयात दोन्ही बाजूंमध्ये चर्चा घडवून आणण्याचा प्रयत्न करण्यात आला. मात्र, कोणताही तोडगा न निघाल्याने बैठक निष्फळ ठरली. वादाच्या पार्श्वभूमीवर गावातील वातावरण तणावपूर्ण असून पोलिसांकडून बंदोबस्त वाढवण्यात आला आहे.
मिळालेल्या माहितीनुसार, डोर्लेवाडीतील वैदू समाजाच्या श्रीराम गृहनिर्माण संस्थेच्या मालकीची जागा काही वर्षांपूर्वी ग्रामपंचायतीला विकासकामांसाठी बक्षिसपत्राद्वारे देण्यात आली होती. या परिसरात समाजमंदिर, व्यायामशाळा आणि सार्वजनिक महादेव मंदिर आहे.
या जागेच्या काही भागात खासदार निधीतून बहुउद्देशीय सभागृह उभारण्यास मंजुरी मिळाली होती. त्यानुसार मागील महिन्यात बांधकामासाठी कॉलम उभारण्याचे काम सुरू करण्यात आले. मात्र, सभागृहामुळे मंदिराच्या नियोजित कामात अडथळा निर्माण होईल, तसेच वाहतुकीसाठी असलेल्या रस्त्याचा प्रश्न निर्माण होऊ शकतो, अशी भूमिका घेत एका गटाने ग्रामपंचायतीकडे तक्रार केली. त्यानंतर सभागृहाचे बांधकाम थांबवण्यात आले.
परिस्थिती लक्षात घेऊन ग्रामपंचायत प्रशासनाने संबंधित जागेची पाहणी केली. त्यानंतर दोन्ही बाजूंचे म्हणणे ऐकून घेण्यासाठी बैठक आयोजित करण्यात आली. प्रशासनातील अधिकारी, स्थानिक पदाधिकारी तसेच शिंदे आणि निंबाळकर गटाशी संबंधित कार्यकर्ते या चर्चेला उपस्थित होते.
बैठकीदरम्यान दोन्ही गटांनी आपापली भूमिका मांडली. वाद सामंजस्याने सोडवण्यासाठी प्रशासनाकडून पर्याय सुचवण्यात आला. मात्र, हा प्रस्ताव दोन्ही बाजूंना मान्य झाला नाही. त्यामुळे सभागृहाचे बांधकाम, मंदिराची जागा आणि रस्त्याशी संबंधित प्रश्नावर कोणताही अंतिम निर्णय होऊ शकला नाही.
दरम्यान, वाद अधिक वाढू नये आणि गावातील शांतता कायम राहावी यासाठी पोलिसांनी अतिरिक्त बंदोबस्त ठेवला आहे. प्रशासनाकडूनही परिस्थितीवर लक्ष ठेवले जात असून, पुढील काळात दोन्ही गटांमध्ये पुन्हा चर्चा होण्याची शक्यता आहे.
