पुणे: पुण्याच्या लोणीकंद परिसरातून एक हृदयद्रावक आणि तितकीच धक्कादायक घटना समोर आली आहे. एका २० वर्षीय तरुणीने छळाला कंटाळून आयुष्य संपवले. सुरुवातीला आत्महत्या वाटणाऱ्या या प्रकरणाला आता तब्बल चार महिन्यांनंतर गंभीर वळण मिळाले असून, पोलिसांनी प्रियकरासह त्याच्या दुसऱ्या प्रेयसीला बेड्या ठोकल्या आहेत.
नक्की काय घडलं?
मृत तरुणीचा प्रियकर सौरभ जगताप (वय २२) याने दोघांमध्ये सर्व काही सुरळीत सुरू असतानाच, सौरभचे काजल तिवारी (वय १९) नावाच्या दुसऱ्या मुलीशी प्रेमसंबंध असल्याचा संशय मृत तरुणीला आला. एकाच वेळी दोघींसोबत प्रेमसंबंध ठेवल्याच्या या प्रकारातून त्यांच्यात सातत्याने वाद होत होते. सौरभ आणि काजल या दोघांकडून होणारा मानसिक त्रास असह्य झाल्याने, अखेर जानेवारी महिन्यात तरुणीने हतबल होऊन टोकाचे पाऊल उचलले.
दरम्यान, या प्रकरणी पोलिसांनी कसून तपास केला असता, तांत्रिक पुरावे आणि चौकशीअंती यामागील मानसिक छळाचे सत्य समोर आले. तरुणीला आत्महत्येस प्रवृत्त केल्याच्या आरोपाखाली पोलिसांनी अखेर चार महिन्यांनी सौरभ आणि काजल दोघांना अटक केली असून पुढील कारवाई सुरु आहे.
