लोणी काळभोर, ता. 20 : सोलापूर-पुणे महामार्गावर रस्त्याच्या मधोमध धोकादायक पद्धतीने 16 टायर ट्रक उभा करून वाहतुकीला अडथळा निर्माण करणाऱ्या चालकावर लोणी काळभोर पोलिसांनी मंगळवारी (ता. 18) सायंकाळी कारवाई केली. वाहतूक कोंडीसह वाहनचालकांच्या जीवितास धोका निर्माण करणाऱ्या या प्रकारामुळे पोलिसांनी ट्रक ताब्यात घेत चालकाविरोधात कायदेशीर कारवाई केली आहे.
शब्बीर मेहबुब खान (वय 35, रा. बनकर कॉलनी, त्रिपुरनाथ, बसवकल्याण, जि. बिदर, कर्नाटक) असे गुन्हा दाखल करण्यात आलेल्याचे नाव आहे. या प्रकरणी पोलीस अंमलदार प्रवीण लक्ष्मण दडस यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, लोणी काळभोर पोलीस ठाण्याच्या हद्दीत पोलीस पथकाकडून पेट्रोलिंग सुरू होते. लोणी काळभोर येथील शिवशक्ती टाईल्स दुकानासमोर सोलापूर-पुणे महामार्गावर अशोक लेलँड कंपनीचा 16 टायर ट्रक (क्र. केए 56-6618) धोकादायक पद्धतीने उभा असल्याचे मंगळवारी रात्री पावणे आठ वाजता पोलिसांच्या निदर्शनास आले.
या ट्रकमुळे महामार्गावरील वाहतुकीला अडथळा निर्माण होऊन वाहतूक कोंडी झाल्याचे पोलिसांनी नमूद केले. तसेच वाहन अशा पद्धतीने उभे करण्यात आले होते की, त्यामुळे वाहनचालक तसेच इतर नागरिकांच्या जीवितास धोका निर्माण होण्याची शक्यता होती.
पोलिसांनी पंचांच्या समक्ष ट्रकचालकाची चौकशी केली असता त्याने आपले नाव शब्बीर मेहबुब खान असल्याचे सांगितले. ट्रक रिकामा असतानाही सार्वजनिक रस्त्यावर वाहतुकीला अडथळा होईल अशा पद्धतीने तो उभा केल्याचे पोलिसांच्या निदर्शनास आले. त्यानुसार चालक शब्बीर खान याच्याविरोधात कायदेशीर कारवाई करण्यात आली आहे.
दरम्यान, सार्वजनिक रस्त्यावर वाहतुकीला अडथळा निर्माण करणाऱ्या वाहनांवर कारवाई करण्यासाठी लोणी काळभोर पोलिसांकडून पेट्रोलिंग वाढविण्यात आले असून, महामार्गावर बेदरकारपणे वाहने उभी करणाऱ्यांवर कारवाईचा बडगा उगारला जाणार असल्याचे पोलिसांकडून स्पष्ट करण्यात आले आहे.
