इंदापूर : आईच्या नावावरील जमीन विकल्याच्या कारणावरून वाद झाल्यानंतर दोन मुलांनी वृद्ध आई-वडिलांना लाकडी दांडक्याने मारहाण करून शिवीगाळ व जीवे मारण्याची धमकी दिल्याची धक्कादायक घटना तरंगवाडी (ता. इंदापूर) येथे 30 ऑगस्ट रोजी सायंकाळी सहाच्या सुमारास घडली. या मारहाणीत वृद्ध दाम्पत्य जखमी झाले असून, त्यांच्यावर इंदापूर उपजिल्हा रुग्णालयात उपचार सुरू आहेत.
याप्रकरणी तुकाराम किसन राऊत (वय 65, रा. सरस्वतीनगर, इंदापूर) यांनी पोलिसांना जबाब दिला आहे. त्यानुसार त्यांचे मुलगे संजय तुकाराम राऊत व राजेंद्र तुकाराम राऊत (दोघे रा. माळवाडी नं. 2, ता. इंदापूर) यांच्याविरोधात तक्रार दाखल करण्यात आली आहे.
पोलिसांनी दिलेल्या माहितीनुसार, तुकाराम राऊत हे आजारी पत्नी अंजना यांच्यासोबत तरंगवाडी येथील सलीम लॉन्सजवळील रस्त्यावर फिरत होते. त्यावेळी दोन्ही मुलगे कारमधून तेथे आले. “आईच्या नावावरील जमीन का विकली?” असा जाब विचारत त्यांनी लाकडी दांडक्यांनी आई-वडिलांना मारहाण केली. या मारहाणीत तुकाराम राऊत यांच्या पाठीत, तोंडावर, दोन्ही मांडीवर व डाव्या खांद्यावर दुखापत झाली. तर पत्नी अंजना यांच्या उजव्या मनगटाजवळ व कमरेला मार लागला.
दरम्यान, मुलांनी “विकलेली जमीन परत घ्या, नाहीतर तुम्हाला आमचा हिसका दाखवतो,” अशी धमकी देत शिवीगाळ व दमदाटी केल्याचेही तक्रारीत नमूद आहे. मारहाणीचा आवाज ऐकून नागरिक जमा झाले आणि त्यांनी पोलिसांना माहिती दिली. त्यानंतर पोलिसांनी वृद्ध दाम्पत्याला उपचारासाठी रुग्णालयात पाठविले. जमिनीच्या व्यवहारावरून सुरू झालेल्या कौटुंबिक वादाला हिंसक वळण मिळाल्याने परिसरात चर्चा रंगली असून, या प्रकरणाचा पुढील तपास पोलिसांकडून सुरू आहे.
