लोणी काळभोर, ता. 24 : प्रेमविवाह करून सासरी गेलेल्या 20 वर्षीय विवाहितेला पती, सासू-सासरे आणि दिराकडून (Pune Crime) सतत मानसिक व शारीरिक छळ सहन करावा लागल्याची धक्कादायक घटना समोर आली आहे. “तु पनौती आहेस, दरिद्री आहेस” असे म्हणत शिवीगाळ, मारहाण, गळा दाबण्याचा प्रयत्न आणि चारित्र्यावर संशय घेत छळ करण्यात आल्याप्रकरणी मांजरी पोलिसांनी चौघांविरोधात गुन्हा दाखल केला आहे. (Latest Marathi News)
याबाबत पवित्रा चंद्रकांत कोष्ठी (वय 20, रा. तुपेनगर, गोपाळपट्टी, मांजरी बु.) यांनी मांजरी पोलीस ठाण्यात फिर्याद दिली आहे. त्यानुसार पती राकेश अर्जुन पवार, सासू सुरेखा अर्जुन पवार, सासरे अर्जुन तिम्मा पवार आणि दिर सुजल अर्जुन पवार (रा. वेताळबाबा वसाहत, हडपसर) यांच्याविरोधात गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी युवती आणि राकेश पवार यांची ओळख शिक्षण घेत असताना झाली होती. त्यानंतर दोघांनी 25 ऑगस्ट 2025 रोजी आळंदी येथे प्रेमविवाह केला. सुरुवातीला काही दिवस सर्व काही सुरळीत होते. मात्र, त्यानंतर पती व सासरच्यांकडून किरकोळ कारणांवरून भांडणे सुरू झाली.
फिर्यादीने पुढील शिक्षणाबाबत विचारणा केल्यानंतर पती राकेश याने वाद घालण्यास सुरुवात केली. त्याला दारूचे व्यसन असल्याचे लग्नानंतर समोर आले. याबाबत विचारणा करताच तो शिवीगाळ करून मारहाण करत असल्याचा आरोप फिर्यादीने केला आहे. सासू-सासरे आणि दिर हे देखील पतीची बाजू घेत “तुला स्वयंपाक येत नाही, घरकाम येत नाही” अशा कारणांवरून छळ करत होते. एका रात्री उशिरा झालेल्या वादात पतीने तिचा गळा दाबण्याचाही प्रयत्न केला. तिच्या आरडाओरडीनंतर तिला उपचारासाठी रुग्णालयात नेण्यात आले. त्यानंतर ती माहेरी राहू लागली.
दरम्यान, 11 ऑक्टोबर 2025 रोजी मध्यरात्री पती राकेश पवार हा पत्नीच्या माहेरी गेला. त्याने घरासमोर मोठमोठ्याने शिवीगाळ करत दगड मारून मोटारसायकलचे नुकसान केले. तसेच फिर्यादीच्या हाताला चावा घेत पोट आणि पाठीवर मारहाण केल्याचे तक्रारीत नमूद आहे. परिसरातील नागरिकांनी पोलिसांना बोलाविल्यानंतर हा प्रकार थांबला.
यानंतर आरोपींनी पुन्हा “चांगले वागवू” अशी हमी देत तिला सासरी नेले. मात्र, काही दिवसांतच पुन्हा मानसिक आणि शारीरिक छळ सुरू झाला. पती आणि दिर हे वारंवार तिच्या चारित्र्यावर संशय घेत असल्याचा आरोपही फिर्यादीने केला आहे. अखेर जानेवारी 2026 पासून ती माहेरी राहत आहे. या प्रकरणी मांजरी पोलिसांनी भारतीय न्याय संहिता (BNS) कलम 115(2), 3(5), 351(1), 352 आणि 85 अन्वये गुन्हा दाखल केला असून पुढील तपास सुरू आहे.
