पुणे: दिवाळीच्या शुभमुहूर्तावर नवीन कार खरेदी करण्याचा आनंद काही क्षणांतच दुःखात बदलला. नव्या कारमधून फिरण्यासाठी बाहेर पडलेल्या तिघांवर काळाने घाला घातला. सासवड-हडपसर सेवा रस्त्यावर उभ्या असलेल्या कंटेनरला कारची जोरदार धडक बसली. या भीषण अपघातात कारमधील 2 जणांचा मृत्यू झाला, तर चालक गंभीर जखमी झाला आहे. ही घटना 10 नोव्हेंबर रोजी मध्यरात्रीच्या सुमारास घडली.
संजय वसंत मोडक (वय 49) आणि अविनाश बाळासाहेब अर्णे (वय 35) अशी मृतांची नावे आहेत. तर सुनील दिगंबर मोडक (वय 39) हे या अपघातात जखमी झाले आहेत. अपघातानंतर सुनील यांनी फुरसुंगी पोलीस ठाण्यात तक्रार दाखल केली. त्यानुसार पोलिसांनी कंटेनर चालकाविरोधात गुन्हा नोंदवला आहे.
नेमका अपघात कसा घडला?
मिळालेल्या माहितीनुसार, लक्ष्मीपूजनाच्या दिवशी तिघांनी नवीन कार खरेदी केली होती. त्यानंतर नव्या गाडीतून फेरफटका मारण्यासाठी ते बाहेर पडले. सुनील मोडक हे कार चालवत होते. त्यांच्यासोबत संजय मोडक आणि अविनाश अर्णे हे देखील होते. तिघेही सासवड-हडपसर सेवा रस्त्याने हडपसरच्या दिशेने जात होते.
याचवेळी रस्त्यावर एका ठिकाणी कंटेनर उभा करण्यात आला होता. विशेष म्हणजे, या सेवा रस्त्यावर वाहन पार्क करण्यास परवानगी नसतानाही कंटेनर चालकाने तिथे गाडी उभी केली होती. त्यातच रात्रीच्या वेळी कंटेनरचे पार्किंग दिवेही सुरू नव्हते. त्यामुळे अंधारात उभा असलेला कंटेनर कारचालकाच्या लक्षात आला नाही आणि कार थेट त्याला धडकली.
धडक इतकी जोरदार होती की संजय मोडक आणि अविनाश अर्णे यांचा मृत्यू झाला. या घटनेमुळे परिसरात हळहळ व्यक्त होत आहे. फुरसुंगी पोलीस या अपघाताचा पुढील तपास करत आहेत.
