पुणे: दिवाळीच्या सणात वाढत्या महागाईमुळे आधीच त्रस्त असलेल्या नागरिकांना आणखी एक आर्थिक फटका बसला आहे. पुणे, पिंपरी-चिंचवड आणि नाशिक जिल्ह्यात सीएनजी (CNG) आणि घरगुती पीएनजी (PNG) गॅसच्या किमती वाढवण्यात आल्या आहेत. महाराष्ट्र नॅचरल गॅस लिमिटेडने (MNGL) या दरवाढीची घोषणा केली असून 12 आणि 13 नोव्हेंबरच्या मध्यरात्रीपासून नवीन दर लागू झाले आहेत.
नवीन दरांनुसार, सीएनजीच्या किमतीत प्रतिकिलो 1 रुपये 25 पैशांची वाढ करण्यात आली आहे. त्यामुळे पुणे, पिंपरी-चिंचवड आणि परिसरात सीएनजीचा दर आता 99 रुपये 75 पैसे प्रतिकिलो झाला आहे. याचा थेट परिणाम सीएनजीवर चालणाऱ्या रिक्षा, टॅक्सी आणि खासगी वाहनधारकांच्या खर्चावर होण्याची शक्यता आहे.
दुसरीकडे, घरगुती वापरासाठी असलेल्या पाइप्ड नॅचरल गॅस म्हणजेच पीएनजीच्या दरातही वाढ करण्यात आली आहे. पीएनजीच्या किमतीत प्रति एससीएम (SCM) 1 रुपये 50 पैशांची वाढ झाली आहे. त्यामुळे ग्राहकांना आता प्रति एससीएम 51 रुपये 75 पैसे मोजावे लागणार आहेत.
विशेष म्हणजे, गेल्या काही महिन्यांत गॅसच्या किमती वाढण्याची ही दुसरी वेळ आहे. यापूर्वी सप्टेंबर महिन्यात सीएनजीच्या दरात प्रतिकिलो 2 रुपयांची वाढ करण्यात आली होती. त्याचवेळी घरगुती पीएनजीच्या दरात प्रति एससीएम 1 रुपयांची वाढ झाली होती.
