पुणे : गणेशोत्सवादरम्यान अनेक ठिकाणी दिवंगत अजित पवार यांचे देखावे साकारून त्यांच्या आठवणींना उजाळा देण्यात आला. पुण्यातील आंबेगाव येथे एका गणेश मंडळाने ‘अजित सृष्टी’ हा भावपूर्ण देखावा साकारला आहे. या देखाव्याला राष्ट्रवादी काँग्रेसचे युवा नेते जय पवार यांनी मंगळवारी (ता. २२) कार्यकर्त्यांच्या आग्रहाखातर भेट दिली. वडील अजित पवार यांच्या आठवणींना उजाळा देणारा हा देखावा पाहताना जय पवार भावुक झाल्याचे पाहायला मिळाले.
स्थानिक कार्यकर्ते युवराज बेलदरे यांनी गणेशोत्सवाच्या माध्यमातून अजित पवार यांच्या कार्याचा आणि आठवणींचा जागर करण्यासाठी हा देखावा उभारला आहे. ‘अजित सृष्टी’च्या माध्यमातून अजित पवार यांच्या कार्याला आणि स्मृतींना आदरांजली अर्पण करण्यात आली आहे. देखावा पाहण्यासाठी जय पवार यांचे आगमन झाल्यानंतर परिसरात भावनिक वातावरण निर्माण झाले.
जय पवार देखाव्याच्या ठिकाणी असताना पार्श्वभूमीवर अजित पवार यांच्या आवाजातील भाषण सुरू होते. यावेळी, “आई अजून रडत असते का? तिला सांगा रडू नको म्हणून…” हे वाक्य ऐकू आले. अजित पवार यांच्या आवाजातील हे शब्द ऐकताच जय पवार भावुक झाले. काही क्षण ते स्तब्ध झाले आणि त्यांच्या डोळ्यांत अश्रू आले. त्यांनी डोळे पुसत बाप्पाची आरती केली.
अजित पवार यांच्या आठवणींनी जय पवार यांना भावनिक केलेला हा प्रसंग उपस्थित कार्यकर्ते आणि नागरिकांनी पाहिला. युवराज बेलदरे यांच्यासह स्थानिक पदाधिकारी, कार्यकर्ते आणि नागरिक यावेळी उपस्थित होते. गणेशोत्सवाच्या माध्यमातून अजित पवार यांच्या कार्याच्या आणि आठवणींच्या स्मरणासाठी साकारण्यात आलेल्या या देखाव्याची परिसरात चर्चा होत आहे.
