बारामती, (पुणे) : राष्ट्रवादी काँग्रेस (शरदचंद्र पवार) पक्षाचे कर्जत-जामखेडचे आमदार रोहित पवार यांचे स्वीय सहाय्यक (PA) अजित दशावतारे यांच्या 12 वर्षीय मुलीचा मृतदेह संशयास्पद स्थितीत आढळून आल्याने बारामतीत खळबळ उडाली आहे. रुई परिसरातील साईनगर भागात आज सकाळी हा मृतदेह आढळून आला.
मिळालेल्या प्राथमिक माहितीनुसार, रात्री आई आणि मुलीमध्ये किरकोळ कारणावरून वाद झाला होता. त्यानंतर मुलगी घरातून निघून गेली. मुलगी बेपत्ता झाल्याचे लक्षात आल्यानंतर कुटुंबीयांनी पोलिसांकडे मिसिंगची तक्रार दाखल केली होती. मात्र, सकाळी घराजवळच मुलीचा मृतदेह आढळून आल्याने परिसरात खळबळ उडाली. घटनेची माहिती मिळताच पोलिसांनी घटनास्थळी धाव घेतली असून, मृतदेह ताब्यात घेऊन पुढील प्रक्रिया सुरू केली आहे.
मुलीचा मृत्यू नेमका कशामुळे झाला? हा घातपात आहे की आत्महत्या, याबाबत अद्याप अधिकृत माहिती समोर आलेली नाही. त्यामुळे पोलिसांकडून सर्व शक्यता तपासल्या जात असून, घटनेचा सखोल तपास सुरू आहे. दरम्यान, या घटनेची माहिती मिळाल्यानंतर आमदार रोहित पवार हे घटनास्थळी येणार असल्याची माहिती आहे.
दरम्यान, अल्पवयीन मुलीच्या संशयास्पद मृत्यूमुळे रुई-साईनगर परिसरात हळहळ व्यक्त होत असून, तपासातून या घटनेमागचे नेमके कारण स्पष्ट होण्याची प्रतीक्षा आहे.
